"Un piatto senza confini": "contest" internatzionale in sa Marina

In sa Mesa - Su 15 e su 16 de su mese de nadale 2022 sa Marina de Casteddu aberit sa ghenna a unu "contest" enogastronòmicu internatzionale de interessu mannu: "Un piatto senza confini". Ant a èssere 12 sos ristorantes protagonistas e tres sas brigadas ghiadas dae tres "master chef" chi s'ant a cunfrontare in su contest. Sos "master chef" sunt Gianni Tarabini, Luigi Pomata e Anuelo Serra e faghent parte de s'assòtziu "Euro-Toques Italia". S'assòtziu est presididu dae Enrico Derflingher.

Atores importantes de "Un piatto senza confini" ant a èssere sos produtos de su territòriu a Km 0. Tra custos: su tzaferanu, su binu Carignanu, su casu berbeghinu e s'iscartzofa sarda. Sunt totus produtos promotzionados dae sos mega mercados naturales de Cal 'e Sèda, de Sant'Antiogu, de Bidd'e Sorris, est a nàrrere dae realidades chi sunt ghiadas, de pare a pare, dae Roberto Perseo, Gianni Esu e Franco Onnis.

Su tzaferanu, su binu Carignanu, su casu berbeghinu e s'iscartzofa sarda sunt sos ingredientes chi devent èssere impreados a manera obligatòria in su menu comune de sas tres brigadas. Sa fantasia de sos "chef" at a addobiare sabores, retzetas e tècnicas culinàrias de àteras culturas.

"Cun su màndigu – at acraradu a s'ANSA Gianluca Mureddu, Presidente de su 'Consorzio Cagliari Centro Storico' e conca de sa manifestatzione - ghetamus a terra làcanas e pregiudìtzios gràtzias a sa fortza de sos territòrios chi espressant primores apretziados in totu su mundu".

Comente onni gara "Un piatto senza confini" at finas una giuria. Custa, in prus de sos "chef" Enrico Deflingher, Sergio Mei e Alberto Lupini, est cumposta dae su diretore de sa rivista "Italia a Tavola", dae su giornalista Enrico Pilia e dae sa velocista Dalia Kaddari. "S'obietivu – at pretzisadu Mureddu - est de promotzionare sos produtos de calidade de sos territòrios pro mèdiu de unu turismu enogastronòmicu culturale e esperentziale".

Comente est òviu sa gara "Un piatto senza confini" at a àere una finale chi s'at a isboligare su 16 de su mese de nadale cun sos "chef" de "Euro-Toques Italia" in s''Hotel Regina Margherita" de Casteddu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22