Su “Fiore Sardo DOP”, unu produtu de primore de Sardigna

In sa Mesa - Su casu de berbeghe "Fiore Sardo DOP" est unu produtu otentu dae su late de sas berbeghes de ratza autòctona sarda, duncas, dae su late de cudda ratza de berbeghe chi fiat allevada in Sardigna giai dae sos nuraghinos.

Mentovadu in sa "Convenzione di Stresa" de su 1951, custu casu at otentu sa "Denominazione Tipica" in su 1955 e sa "Denominazione d'Origine" in su 1974. No est acabbada inoghe, pro ite dae su 1996 su "Fiore Sardo " at sa "Denominazione d'Origine Protetta", est a nàrrere ca at su marcu DOP.

Sa particularidade de custu casu est cajonada dae sas tècnicas de traballadura, chi sunt sas matessi de s'antigu. Faeddamus de tècnicas màstrinas de su sèculu IV sèculu a pustis de Cristu.

Sa paràula "fiore" est ligada a sa formadura, e, a manera pretzisa est ligada a sas pischeddas istampadas fatas in linna de castàngia o de pirastru chi fiant tarassiadas cun su frore, cun probabilidade unu lìgiu o unu cardillone. Custu frore lassat unu marcu subra su casu. A s'ispissu su marcu est acumpangiadu dae sas initziales de su produtore.

Su "Fiore Sardo" est unu casu chi aunit traditzione e innovatzione. In die de oe, pro fàghere custu casu s'impreant tècnicas modernas. Difatis, in su disciplinare si previdint siat sos mètodos antigos de produtzione siat sas tècnicas de produtzione modernas. Semper che semper, su caràtere màstrinu de sa DOP no est istadu modificadu.

Tocat a sutalineare ca oe su "fiore Sardo DOP" at un'esportatzione finas foras dae s'istadu italianu.

Pretzisamus ca su “Fiore Sardo” si faghet a manera esclusiva in Sardigna: est unu casu cun un'istòria antiga, chi s'ischerat pro àere unu sabore caraterìsticu. Unu sabore perfetu pro valorizare sas camineras gastronomicas de sa traditzione sarda. Pro fàghere un'esempru, su "Fiore Sardu" est s'ingrediente licantzu de su Pane Fratau. De ogni manera, custu casu est perfetu peri pro dare vida a retzetas innovativas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22