Resèssida pro su "Aromatico Gange" de Passiu

In sa Mesa - S'"Aromatico Gange" est istadu premiadu dae s'editzione noa de "Top Italian Food" de su "Gambero Rosso". S'azienda de Aristanis sighit in sa caminera de sa resèssida e, pro su 2023, in prus de su risu Carnaroli batit a domo finas sa cunfirma pro su risu "Aromatico Gange". Su "Carnaroli" est a sa de duas cunfirmas consecutivas.

No est totu, pro ite su risu de Passiu, tocat a lu nàrrere, est s'ùnicu risu "Carnaroli" de Sardigna presente in sa ghia prus famada de Itàlia.

De ogni manera, comente amus giai sutalineadu, Passiu faghet allegare finas de àteros produtos suos. Sa referèntzia est a su risu "Aromatico Gange", chi intrat in sa ghia de su 2023. Sa ghia est istada presentada domìniga 18 de su mese de Nadale 2022 in s'addòbiu chi s'est isboligadu in su 'Roma Convention Center' de Roma.

Cun sa presentatzione de "Top Italian Food" lompet peri sa decraratzione de Felice Passiu, titulare e responsàbile cummertziale e "marketing" de s'azienda de Aristanis: "Semus a beru satisfatos de sos resurtados otèntos in su tempus dae sos risos nostros, chi a bellu a bellu sunt intrende in su coro de sos consumadores". A pustis at sighidu: "s'azienda nostra est s'ùnica in Sardigna chi coltivat su 'Carnaroli' autènticu, garantidu e tzertificadu dae s''Ente Nazionale Risi'. Su produtu at s'iscrita 'Classico'”. Feddande de su risu “Aromatico Gange”, est a nàrrere de su produtu intradu ocannu in s'editzione noa de "Top Italian Food", imbetzes, Felice Passiu sutalìneat ca "s''Aromatico Gange' rapresentat un'òtima ischerta a su risu 'Basmati' e est sa primu ratza aromata registrada in Itàlia. Torramus gràtzias a s'iscuadra nostra e a totus sas persones chi agiudant a su 'Riso Passiu'".

Duncas, finas in su 2023 su risu "Carnaroli" clàssicu de s'azienda Passiu at a pòdere impreare su marcu "Top Italian Food", sighende gosi a si cunfirmare comente produtu de primore sardu. Sa calidade manna de custu Carnaroli non praghet feti a "Gambero Rosso". Difatis sa ratza "Carnaroli" praghet finas a sos "chef" e a sos amantiosos de sa coghina chi lu cunsìderant su rei de su risu. Duncas, sa resèssida de su risu "Carnaroli" Passiu non est cosa de pagu contu pro s'azienda e pro totu sa Sardigna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22