In Ovodda unu fine de chida esperientziale cun "Ovodda Experience"

In sa Mesa – In Ovodda sas dies chi moent dae su 16 de nadale finas a su 18 de nadale 2022 ant a èssere unu fine de chida esperientziale, tres dies de festa manna tra tastos, laboratòrios e bisitas ghiadas. Su programma est fìgiu de unu progetu de comunidade chi at a durare pro tres annos. In s'editzione de ocannu, est a nàrrere in sa nùmeru unu, sos màndigos ant a èssere protagonistas importantes.

Su progetu chi s'at a isboligare in Ovodda si lamat "Ovodda Experience" e at s'obietivu de fàghere connòschere sa bidda. Ma cale est s'idea mama? S'idea mama est sa de realizare unas cantas esperièntzias de fàghere paris cun sa comunidade.

Naschent gosi sos cantigheddos de sa vida de onni e at a tocare a los cumpartzire: fàghere su pane paris cun sos paneteris, fàghere su casu cun sos pastores, coghinare su casu arrustu e sos pitzudos, connòschere sas bellesas archeològicas e sas de sa natura a inghìriu de sa bidda.

Sa manifestatzione est organizada dae s'Assessoradu de sa Cultura e de s'Isvilupu locale de sa bidda cun s'agiudu de sa Pro Loco, de su Tzentru Cummertziale naturale, de s'assòtziu ipicu ovoddesu, de s'"Asd Doghändelas", de s'"Avis" e finas cun su sustennu de s'"Agenzia Regionale Laore".

Sas de Ovodda ant a èssere tres dies de addòbios e ant a àere sa punna de agiudare a sos furisteris a iscobèrrere su territòriu de sa bidda. In prus de sos operadores de su turismu "Ovodda Experience" at comente protagonistas sas atividades produtivas de Ovodda etotu. Difatis, a indanimare sas dies de "connoschèntzia" ant a èssere sas bisitas ghiadas in sas aziendas, ofitzinas verdaderas in ue imparare a fàghere su pane e sos durches, ma finas in ue bìdere comente si traballant s'ortigu, su ferru, su granitu, sa pedde, sa linna e su còrgiu. No est totu, b'ant a èssere finas tastos e sèmidas pensadas pro allùghere sos sensos. In su programma de sàbadu e domìniga sunt finas prevididos tastos de binos e de castàngia de su territòriu.
 

Attività realizzata col contributo della Regione Sardegna - IMPRENTAS 2021-2022. LR 22/2018, art. 22