In Ogiastra s'addòbiu "Loceri con Gusto 2022"

In sa Mesa – Ocannu in Ogiastra s'addòbiu "Loceri con Gusto 2022" lompet a sa de tres editziones. Su 17 de nadale sos protagonistas de sa festa organizada dae sa Comuna de Loceri e dae sa Pro Loco de sa bidda ant a èssere sa masserìtzia e s'agrualimentare. Regalos de Nadale sìncheros e produtos de sa masserìtzia e de s'agrualimentare de domo ant a èssere bèndidos a manera dereta dae sos produtores in su mercadeddu de Nadale de sa bidda.

Chircare unas cantas produtziones locales, tastare sos produtos de su territòriu e intrare in su coro de sas polìticas ambientales at a èssere unu discansu de fàghere in su tzentru de sa bidda, est a nàrrere in sa pratza printzipale de Loceri, logu in ue s'ant a pòdere connòschere mègius sos màndigos de su logu.

Màndigos e natura ant a rapresentare sos ingredientes de una manifestatzione chi, comente sutalìniat su sìndigu de sa comunidade Gianfranco Lecca, ant a èssere s'ànima de su tempus benidore, sos elementos chi ant a fàghere bìvere pro tempus meda su pianeta. No est pro nudda ca sa filosofia de "Loceri con Gusto" si fundat subra su respetu pro sa natura, unu respetu rapresentadu dae sos frutos chi batit sa terra loceresa e chi sos organizadores cherent fàghere connòschere a sos consumadores.

Sa manifestatzione loceresa at a incumentzare sàbadu 17 de nadale a sas 15.00 cun su laboratòriu pro sa natura: sos pitzinnos in pratza Nonnu Melis ant a fàghere s'àrbore de Nadale cun materiale ritzicladu. S'Àrbore est istadu dadu dae s'”Agenzia Forestas”. A sas 17.00 semper in pratza Melis s'at a allùghere sa mùsica cun sos cantos de su Trio S'Istella, mentras a 17.30 s'at a afestare semper su Nadale cun sa bèndida a s'asta de sos gioghitos de Nadale de donare a so pitzinnos pòberos brasilianos.

S'abertura de sos "stand" est previdida pro sas 19.00. In sos "stand" sa gente at a agatare produtos licanzos e primorosos: pasta frisca, binu, durches e produtos enogastronomicos de onni tipu. No est totu, pro ite in Loceri in prus de sos màndigos b'ant a èssere finas sas propostas de sos artesanos e de sos hobbistas de Sardigna.

Tra forreddos allutos, nuscos e tastos "Loceri con Gusto 2022" at a serrare a tardu mannu de note.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22