"Agnello IGP": acordu contra a sas pràticas illìtzitas

In sa Mesa - Pro s'"Agnello IGP di Sardegna" arribat s'acordu contra a sas pràticas illìtzitas. Naschet, difatis, s'angione ecuànime e solidale. Est unu resurtu importante meda, pro ite custu produtu de Sardigna s'at a dèpere pagare su prètziu giustu. In prus, pro s'angione ecuànime e solidale est unu primu passu in sa cadena produtiva natzionale.

A canto b'at iscritu in su protocollo de intesa sutascritu tra "Fratelli Ibba Srl - Abbi group" e "Coldiretti Sardegna" e firmadu dae sos massajos italianos e dae Federico Stocchino de "STC Carni srl", su prètziu de s'"agnello di Sardegna IGP" no at a pòdere èssere inferiore a sos costos de produtzione apostivigados dae s'"Istituto di Servizi per il Mercato Agricolo Alimentare": su costu est de 5,62 èuros cun IVA.

No est totu, pro ite, in matèria de pràticas contràrias b'at finas unu decretu legislativu de su mese de ledàmine de s'annu 2021. Su decretu afiantzat una tutela majore pro sos operadores de sa masserìtzia e de su setore alimentare chi ant sufridu su càrrigu de sos costos de produtzione. Ma de ite est dadu custu càrrigu de costos? A canto narat s'"Istituto di Servizi per il Mercato Agricolo Alimentare" custu càrrigu est dadu dae s' "inflatzione alluta dae sa crisi de s'energia", ma finas "dae su clima". Custos duos elementos "ant reduidu sa disponibilidade de proendas e fatu artziare sos prètzios" ma est cajonadu peri "dae crèschida de sos costos de sa manodòpera".

Sa norma noa, comente chèrridu dae "Coldiretti Sardegna", est un'istrumentu nàschidu a tutela de sa parte prus dèbile de sa filiera. Duncas, chie còmporat un'"agnello IGP di Sardegna" at a èssere seguru de batire in sa mesa unu produtu 100% sardu, bonu, sìncheru e èticu". In àteras paràulas, s'angione de Sardigna a marcu IGP est bonu, sìncheru e èticu pro ite si pagat su prètziu giustu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22