Tàtari: torrat “Week end dei Gusti, delle Arti e dei Mestieri”

In sa Mesa - Torrat in Tàtari "Week end dei Gusti, delle Arti e dei Mestieri", sa manifestatzione chi lompet a sa de XV editziones e s'at a isboligare dae su 24 a su 27 de su mese de santandria de su 2022.

"Week end dei Gusti, delle Arti e dei Mestieri" est un'addòbiu organizadu dae s'assòtziu "Taribari" cun su contributu de s'Assessoradu de su Turismu, Artesania e Cummèrtziu de sa RAS e de su Progetu Salude e Trigu de sa Camera de su Cummèrtziu de Tàtari.

"Week end dei Gusti, delle Arti e dei Mestieri" at finas su patrotzìniu de sa Comuna de Tàtari e est una manifestatzione pesada cun s'agiudu de s'"Intergremio dei Candelieri" de Tàtari, de su Tzentru Cummertziale Naturale "Il Corso" e finas cun s'agiudu de sos cummertziantes e de sos artesanos chi ant a dare vida a una filera de atividades. Sos addòbios ant a èssere una ocasione pro bìvere sas traditziones de su logu.

Sunt "partner" de s'addòbiu finas "Le Ragazze Terribili società cooperativa", sas "Associazioni Officine Condivise", "La Tribú Art Studio", "Tusitala" e "Carta da Musica", sos tzircolos "Fenalc Sassari" e sos hotel "Vittorio Emanuele" e "Leonardo Da Vinci", chi ant a agiudare pro s'organizatzione de s'acasàgiu, de sos tastos e de sos "tour" nàaschidos pro fàghere iscobèrrere su territòriu a sos bisitadores. Faghet parte de sa retza de s'organizatzione finas unu nùmeru mannu de ristorantes, tzilleris, forros de fainè, pitzerias, gastronomias e tratorias tataresas.

Ma ite est "Week end dei Gusti, delle Arti e dei Mestieri"? "Week end dei Gusti, delle Arti e dei Mestieri" est una manifestatzione chi at s'obietivu de ghiare sa gente a s'iscoberta de sos sabores tataresos e de sas traditziones de sa tzitade.

Tocat a sutalineare ca su 2022 at una novidade importante chi ammentat su tempus coladu: s'addòbiu, difatis, ocannu torrat cun sa fòrmula traditzionale sua, est a nàrrere cun sa fòrmula biagiante in intro de sas murallas antigas.

"Week end dei Gusti, delle Arti e dei Mestieri" at a incumentzare giòbia 24 e s'at a concruire domìniga 27 de su mese de santandria. Primu firmada prevìdida: sa "porta Sant'Antonio". Dae inoghe sa manifestatzione s'at a mòere a carrera "Luzzatti" colende pro pratza "Cavallino de Honestis", pratza "Università", carrera "Turritana".In fines at a lòmpere in carrera "Maddalena". Una caminera chi est unu biàgiu esperetziale capassu de fàghere connòschere s'arte e sas traditziones tataresas; una caminera chi at sa punna de fàghere tastare sas retzetas tìpicas de sa tzitade turritana.

Ant a èssere protagonistas de sa manifestatzione sos "laboratori food" de culurgiones, de macarrones de busa, de lorighitas e de birras màstrinas, sos laboratòrios de erboristeria, sos laboratòrios pro imparare a fàghere su mastru de linna e meda àteru.

S'addòbiu de sos "itinerari del gusto" est prevìdidu in sa die de sàbadu 26. "Itinerari del gusto" est una caminera enogastronòmica dedicada a su "street food" e at a interessare sas butegas de su tzentru istòricu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22