Sos “Saboris Antigus” de Seurgus Donigala

In sa Mesa - Torrant sos "Saboris Antigus in is bias de su trigu" de Seurgus Donigala. Domìniga 27 de su mese de santandria sa bidda de sa Trexenta at a acasagiare una manifestatzione rica meda de addòbios.

Arte, cultura, artesanadu e sos sabores ant a èssere sos protagonistas de s'editzione de su 2022 de "Saboris Antigus in is bias de su trigu", sa manifestatzione chi ocannu s'at a isboligare in su tzentru istòricu de sa bidda.

Est pròpiu in su tzentru istòricu chi sos bisitadores ant a agatare sos hobbistas, sos artesanos e sos produtores chi ant a espònnere sas produtziones issoro. No est totu. In sas carreras de sa bidda s'ant agatare peri firmadas in ue mandigare pratos tìpicos, fatos a manera esclusiva cun produtos locales.

"Saboris Antigus in is bias de su trigu" at a incumentzare a sas 8.30 cun sa missa in sa crèsia de Santu Diadoru e cun sa mustra de sos ogetos sacros.

A sas 9.00, imbetzes, in su tzentru istòricu de sa bidda trexentesa at a abèrrere sas ghennas de sas domos pro distribuire pratos e produtos tìpicos. A abèrrere sa ghenna sua at a èssere finas sa Domo de su Pane, in ue s'at a isboligare su "Laboratorio di ricamo, ferri e uncinetto".

Sas 10.30, imbetzes, at a èssere s'ora de s'ismurzu in pratza e de s'addòbiu "Giogus Antigus". S'addòbiu est a incuru de su grupu "scout AGES Siurgus Donigala". Ant a sighire sos addòbios de sa Domo de su Pane, est a nàrrere: su "Laboratorio del gusto presentato da massaie locali" e sos tastos de sos pratos antigos seurghesos.

Galu, a borta de die, sunt prevìdidos unos cantos tastos de durches e de binu de su territòriu.

Sa festa de Seurgus Donigala "Saboris Antigus in is bias de su trigu" at a èssere concruida dae s'ispetàculu de mùsica de sos Dilliriana e dae sos ballos traditzionales esecutados dae sos grupos folk de Seurgus Donigala.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22