In Crabas naschet su “borsino della bottarga”

In sa Mesa - Naschet in Crabas su primu "Borsino della bottarga", un'addòbiu chi biet sa lughe in ocasione de "La bottarga delle lagune di Cabras", una manifestatzione organizada dae su "Centro servizi promozionali per le imprese della Camera di Commercio di Cagliari e Oristano" e finantziada dae sa Regione Autònoma de Sardigna. 50 operadores internatzionales ant a contrapuntare pro s'oro crabarissu.

Su "Borsino della bottarga" s'at a isboligare oe, martis 22 de su mese de santandria, a incumentzare dae sas 11.00 in sa pischera Mar'e Pontis.
 

Sa die, nàschida cun s'agiudu de su "Consorzio Pontis" e de sa "Cooperativa pescatori e molluschicoltori Mistras", at comente obietivu printzipale sa valorizatzione de sa botàriga, unu produtu de primore produidu in laguna giai in s'antigu.

Gràtzias a sos 50 "buyer" chi ant a èssere presentes - 10 sunt acurtziados dae logu istràngiu, mescamente dae sa Germania e dae sa Danimarca - si cheret afortiare s'addòbiu tra sa dimanda e s'oferta. Sa primu est rapresentada dae sos comporadores possìbiles, tra sos cales bi sunt ristoradores natzionales e internatzionales de importu mannu. Sa segunda, imbetzes, est rapresentada dae sos produtores crabarissos, chi ant s'obietivu de fàghere connòschere sa botàriga a manera ulteriore, massimamente de la fàghere connòschere foras de s'Itàlia, in ue sighit a crèschere s'interessu de sos consumadores pro custu produtu.

Tra sas novidades printzipales de s'addòbiu "La bottarga delle lagune di Cabras" b'at a èssere pròpiu su primu "borsino" internatzionale de sa mègius botàriga de mugheddu piscada e traballada in sas lagunas de su territòriu provintziale aristanesu.

Ant a èssere una bindighina sas "baffe" de sa botàriga de Crabas. Sas "baffe" propostas a sos comporadores ant a àere unu pesu de 500 grammos pagu prus o mancu e ant a mòere de unu prètziu base giai apostivigadu. Durante su "borsino della bottarga" su "storyteller" Davide Rampello at a incrarire sas particularidades de sa botàriga de Crabas e su ligàmene chi su produtu at cun su territòriu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22