"A cena con Grazia": s'addòbiu de benefitzèntzia de Guidonia Montecelio

In sa Mesa - Naschet dae sas pàginas de sos romanzos de Grazia Deledda s'idea de s'addòbiu de benefitzèntzia "A cena con Grazia". S'obietivu est de boddire dinare pro pòdere pesare un'iscola de formatzione professionale in Madagascar. S'addòbiu s'at a isboligare in "Tor de' Sordi" a Guidonia Montecelio, in provìntzia de Roma, su 21 de su mese de ladàmine incumentzande dae sas 20.00.

A coghinare su menu de Grazia Deledda, creadu pro sos 150 annos de sa nàschida de su prèmio Nobel dae su ristoradore de Ulìana Vincenzo Palimodde, b'ant a èssere bator "chef" de Sardigna: sa "chef" Vitalia Scano, sa nugoresa Marina Ravarotto de su ristorante "ChiaroScuro" de Casteddu, sa "chef" casteddaja Viviana Amorino, e Tonina Biscu de sa "Sa Horte de su poeta" de Ulìana.

Su menu de "A cena con Grazia" at a èssere fatu feti cun produtos sardos. Sos produtos ant a èssere ofertos dae sas aziendas de Sardigna.

Ma comente naschet su menu deleddianu de Palimodde? Su menu dedicadu a Grazia Deledda naschet dae sa letura chi Palimodde at fatu de sos romanzos e de sas novellas iscritas dae s'iscritora nugoresa. Palimodde at indicadu in ue si mentovant sas retzetas, sos pratos e sos ingredientes de sos romanzos e de sas novellas: sunt prus de 40 sas tzitatziones dae 12 libros de sa Deledda.

Duncas, in sa mesa de "A cena con Grazia" b'at a èssere su filindeu, sos macarrones de busa cundidos cun nughe, su pane gutiadu, sas catas, unu durche frissu tzitadu in "Elias Portolu", sa berbeghe buddida e su porcheddu arrustidu. No ant a mancare mancu sos durches tìpicos, comente sos pabassinos, sa pompia e s'arantzada. E pro bufare? B'at a èssere abbardente, binu nieddu de sa bìngia "Su Pinu" fata cun bides autòctonas, e Nepente, su binu chi faeddat de Ulìana.

In prus, onni pratu at a èssere acumpangiadu dae sa letura de sa tzitatzione deleddiana chi lu interessat.

"A cena con Grazia" est frutu de sa collaboratzione tra sa "chef" Vitalia Scano e s'"enogastronomu" e Presidente de s'"Associazione Stelle del Sud" Gilberto Arru.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22