Casu e late: addòbios formativos in Ázos e in Sìnnia

In sa Mesa - In Ázos e in Sìnnia si faeddat de casu e de trasformatzione de su late cun sos duos tziclos de addòbios formativos aprontados dae s'"Agenzia Laore Sardegna".

Sos addòbios sunt prevìdidos in su perìodu chi andat dae su mese de onniasantu de su 2022 a su mese de ghennàrgiu de su 2023, e sunt girados a sos operadores de sas fàbricas de trasformatzione, a sas impresas zoo-tècnicas e a sos giòvanos sena de traballu.

In sos tziclos de addòbios formativos s'at a chistionare de sas tècnicas de produtzione chi atenent a su traballu de su late.

Unu progetu de formatzione importante, su chi at pesadu s'"Agenzia Laore Sardegna", chi s'at a isboligare in 19 adòbios. Onni tziclu, chi at a àere in totale 54 oras de formatzione, at s'obietivu de favorèssere sa crèschida professionale de sos operadores, e finas su de avalorare sas produtziones sardas de su cumpartu chi pertenet a sa traballadura e a sa trasformatzione de su late.

Pro incaminare onni tziclu de addòbios tocat a àere unu nùmeru mìnimu de 15 iscritos, Sunt iscritos chi devent leare parte a sas letziones. Onni tziclu, però, podet àere unu nùmeru màssimu de 30 iscritos.

Ma ite tocat a fàghere pro aderire a sos addòbios formativos aprontados dae s'"Agenzia Laore Sardegna"? Aderire a sos addòbios formativos est sèmplitze: tocat feti a imbiare una dimanda. Custa est netzessària pro pòdere leare parte a sa seletzione e devet èssere indiritzada a su "Servizio Sviluppo e sostenibilità delle filiere zootecniche e ittiche" de s'"Agenzia Laore Sardegna". Sa dimanda devet èssere imbiada a tzucare dae sas 12.00 de su 6 de su mese de ledàmine finas a su 3 de su mese de onniasantu de su 2022. Est importante a pretzisare ca sa dimanda devet èssere imbiada feti pro mèdiu de PEC, est a nàrrere de posta eletrònica tzertificada.

Sos mòdulos e sas cunditziones pro leare parte a sos tziclos formativos s'agatant in su link sa setzione "Bandi e gare" de su giassu "SardegnaAgricoltura".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22