Bono: una manifestatzione dedicada a su binu e a sa coghina locale

In sa Mesa - At a èssere un'atopu dedicadu a s'acabu de s'istiu e a su cumentzu de s'atòngiu, ma at a pònnere su paladu e sa connoschèntzia de sos sabores a su primu postu. Semus faeddande de sa manifestatzione chi sa comuna de Bono dèdicat a su binu. Un'apuntamentu chi at pro tìtulu "Dall'uva al vino" e chi at sa punna de valoritzare sa coltivatzione de sa bide e sa produtzione locale de binos. Una manifestatzione chi at a rapresentare finas un'ocasione importante pro promotzionare s'enogastronomia de sa regione a inghìriu de Tàtari.

"Dall'uva al vino" previdit bator apuntamentos chi s'ant a isboligare totus in su mese de cabudanni.

Su cumentzu, in programma in su cine-teatru Red Rex pro su 17 de cabudanni a sas 10.00 de mangianu, at a èssere unu momentu de cunfrontu cun su cunvegnu "Dall'uva al vino". A sas 18.00 sos bingiateris ant a promotzionare sos produtos issoro e sos bisitadores ant a pòdere tastare sos binos in pratza San Nicola, in ue s'ant a agatare sas barracas de sos tastos.

Domìniga 18 de cabudanni, a sas 10.00 de mangianu, s'"Azienda Vitivinicola Mulas di Francesca Cabras" at a abèrrere sas ghennas suas a sa binnenna e a sos bisitadores. Su programma previdit finas sa possibilidade de tastare binos e sa de mandigare in bìngia. Lu depimus sutalineare: sos màndigos ant a èssere feti produtos tìpicos locales. A sas 16.00 s'apuntamentu at a sighire cun s'enòlogu Andrea Flore, chi at a fàghere unu cursu pro fàghere connòschere nuscos e aromatos de su binu.

Sa manifestatzione "Dall'uva al vino" at a sighire sàbadu 24 a sas 10.00, cando s'"Azienda Vitivinicola Sotgia SSA" at a cumentzare sa binnenna acollinde chie at su disìgiu de leare parte a sa binnenna, fàghere su binu e pràndere paris cun sos meres e sos traballadores de custa cantina. Pro su pràngiu ant a èssere aprontados pratos de sa coghina tìpica de su logu. A sas 16.00 Andrea Flore at a fàghere sa de duas letziones de su cursu chi pertocat a sos nuscos e sos aromatos de sos binos.

Domìniga 25 de cabudanni ant a èssere sas "Aziende Vitivinicole Farina e Molotzu" a acasagiare sos bisitadores chi ant chèrrere de leare parte a sa binnenna e a su pràngiu chi at a sighire a sos traballos in bìngia. A sas 16.00 est in programma sa de tres letziones de su cursu organizadu dae s'enòlogu Andrea Flore. A sas 19.00, in s'azienda Farina est prevididu s'acabu de sa manifestatzione.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22