Lompet a sa de 30 editziones sa "Sagra del Prosciutto" de Talàna

In sa Mesa – In Talàna, bidda de 1129 ànimas chi s'agatat in Ogiastra, torrat ocannu sa “Sagra del Prosciutto”, sa manifestatzione chi in su 2022 lompet a sa de 30 editziones. Sa “Sagra del Prosciutto” s'at a isboligare dae su 6 a su 7 de su mese de austu chi ant a bènnere e torrat a pustis de una firmada de duos annos cajonada dae sa epidemia de covid-19.

Tocat a pretzisare ca custa rassigna gastronòmica rapresentat un'atopu importante pro sa comunidade talanesa, pro ite est un'apuntamentu chi at sa punna de promotzionare sos produtos tìpicos locales, sos màndigos de primore chi sunt produidos dae sos chi bivent in Talàna etotu e massimamente de promotzionare sa coghina talanesa.

Comente pro sas editziones coladas, sa “Sagra del Prosciutto” de su 2022 est aprontada dae sa Pro Loco de Tàlana e, comente in sos annos colados s'isperu est su de batire a Talàna medas bisitadores, non feti sardos ma peri istràngios.

Sa “Sagra del Prosciutto” at a cumentzare a sas 9.00 de mangianu de su 6 de su mese de austu, cando sos espertos de sa bidda ant a mustrare a sos bisitadores comente si traballat su presutu. Pro pòdere leare parte a custa setzione de s'atopu enogastronòmicu, però, tocat a cuntatare sos de sa Pro Loco de Talàna chi ant a pigare sa prenotatzione e ant a organizare sas cosas a manera fine.

Su momentu prus importante de sas duas dies at a èssere cussu de su tastu de su presutu talanesu, chi comente cheret sa traditzione de Talàna e comente si podet lèghere in su manifestu chi faghet publitzidade a sa manifestatzione etotu, depet èssere segadu comente si depet impreande gurteddos ispetziales. No est totu, pro ite tocat a nàrrere puru ca su tastu de su presutu at a èssere acumpangiadu dae cussu de su binu Nanhia 2016, unu “Cannonau di Sardegna DOC” chi est produidu dae sas “Tenute Perdarubia” de Talàna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22