Uri afestat s'iscartzofa cun sa "Sagra del Carciofo"

In sa Mesa - Pro sa comunidade de Uri torrat sa "Sagra del carciofo" cun s'editzione de s'istadiale chi afestat s'iscartzofa. Ocannu sa sagra s'at a isboligare in su primu fine de chida de su mese de austu 2022, est a nàrrere dae chenàbura 5 a sàbadu 6.

Sa manifestazione de s'istadiale, comente sa chi s'isbòligat in su mese de martzu, at a promòvere sa ratza sarda de s'iscartzofa, cussa cun s'ispina. Una ratza nòdida cun su nùmene de "Carciofo spinoso di Sardegna". S'iscartzofa sarda est un'ortalìssia DOP, chi at finas unu "Consorzio di Tutela del Carciofo Spinoso di Sardegna DOP". Su Cunsòrtziu at unu giassu chi podet consultare a s'indiritzu: http://www.carciofosardodop.it/.

Sa versione de s'istadiale de "Sagra del Carciofo di Uri" ocannu lompet a sa de dòighi editziones. Un'editzione chi s'at a isboligare comente semper in "piazza della Libertà"

Aprontada dae s'"Associazione Turistica Pro Loco Uri" cun s'agiudu de sa Comuna de Uri, de sa Regione Autònoma de Sardigna e de sa "Camera di Commercio di Sassari", sa de Uri est una sagra chi interessat chèntinas de aziendas produtivas e de trasformatzione, totus ligadas a sa produtzione e a su cummèrtziu de su "Carciofo Spinoso di Sardegna DOP".

S'editzione de su 2022 de sa "Sagra del Carciofo di Uri" at a afestare s'iscartzofa comente si devet. L'at a fàghere cun retzetas traditzionales nuscosas e licanzas, ma finas cun pratos de sa traditzione aprontados cun una pitzigada de innovatzione. Presentes finas "stand" de "street food".

In prus de s'iscartzofa sa sagra de Uri oferit a su bisitadore s'ocasione de tastare àteros produtos tìpicos de su logu: dae su casu a s'ògiu a su binu. No est totu. Sas duas dies de Uri ant èssere peri s'ocasione pro s'ispassiare cun ispetàculos musicales, ballos e cantos. Custa at a èssere finas un'oportunidade pro nudrigare s'ogru cun sos traballos màstrinos de sos artesanos.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22