Irbono: Laore aprontat sa rassigna de binos nieddos pro produtziones minores

In sa Mesa - S'“Agenzia Laore Sardegna”, ente de sa Regione Autònoma de Sardigna chi pertocat a s'isvilupu in campu agrìculu e chi favoresset sa valorizatzione de sos produtos agrualimentares, aprontat una rassigna de binos nieddos non professionales chi s'at a tènnere a Irbono. Sa rassigna – si podet lèghere in su giassu internet de s'agenzia etotu - lompet ocannu a sa de chimbe editziones.

Tocat peri a pretzisare ca Laore at organizadu sa manifestazione de binos paris cun s'amministratzione de sa comuna de Irbono e cun su tzentru cummertziale naturale de sa bidda de Ozàstra.

Ant a pòdere leare parte a sa rassigna sos meres de bìngia chi ant produtziones minores e chi in s'annu 2021 ant produidu binos nieddos in su territoriu de Ozàstra.

Ma comente si faghet pro partetzipare? Sas cosas sunt unas cantas e simples: sos bingiateris devent imbiare sos botos cun su binu issoro e s'ischeda cun sa descritzione de su produtu e de sa bìngia in ue si faghet su binu chi si cherret imbiare pro sa rassigna. Tocat, però, a si regordare sa data de iscadèntzia: est netzessàriu a lu faghere intro mesu die de su 18 de su mese de argiolas 2022. Sos botos cun su binu e s'ischeda pro sa partetzipatzione devent lòmpere a sos SUT, est a nàrrere sos “Sportelli Unici Territoriali” de s'“Agenzia Laore Sardegna”. Sos isportellos Laore de Ozàstra sunt: su “SUT Bassa Ogliastra” in carrera Roma 19, Jersu e su “SUT Alta Ogliastra”, in carrera Paolo Arzu – Zona Industriale Baccasara –, Tortolì. Su materiale si podet imbiare finas a “Tare'Liquori, Liquirificio di Nando Piroddi” in carrera Cavallotti, Irbono.

Dae su 20 de su mese de argiolas una giuria de espertos at a valutare sos binos e l'at a fàghere in sos aposentos de sa ex palestra, in carrera Elini a Irbono. Su pùblicu at a pòdere èssere presente durante sa valutatzione. Sos traballos ant a incumentzare dae sas 9:00 de su mangianu. Tres dies in fatu, su 23 de su mese de argiolas, s'at a tènnere sa premiatzione de sos binos mègius. S'addòbiu at a èssere a sas 17.30.

Pro àteras informatziones si podet lèghere inoghe.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22