Arborea: torrat sa “Festa delle Etnie” e aprontat una rassigna gastronòmica importante

In sa Mesa - Est in programma pro su 30 e su 31 de su mese de argiolas 2022 sa “Festa delle Etnie” de Arborea. Una festa famada a inghìriu de sa bidda de su Campidanu, una festa chi at a èssere acumpàngiada dae sa sagra de sa sìndria e dae cussa de sa seada. Sa festa, acasagiada in sa pratza dedicada a Maria Ausiliatrice, logu chi marcat su tzentru de sa bidda, torrat a pustis de duos annos. Sa firmada, s'ischit, est istada cajonada dae s'emergèntzia sanitària determinada dae su covid-19.

Organizadores de sa duas dies de Arborea, chi ocannu lompet a sa de 18 editziones, est comente semper sa Pro Loco, chi traballat paris cun s'amministratzione comunale. Paolo Sanneris, su Presidente de sa Pro Loco etotu, promitet una festa chi at a ispantare sa gente chi at a arribare a Arborea. Sa de 18 editziones, difatis, at a èssere una festa in ue su protagonista mannu at a èssere su paladu. In programma, difatis, b'est una rassigna gastronòmica in ue ant a èssere ammaniados pratos de sa traditzione sarda, mandigos de sa coghina de su Venetu, pratos de su Friuli, màndigos de sa traditzione da sa Romanga e peri de su Laziu.

No est totu, pro ite, comente amus giai atzinnadu, sa festa at a èssere finas s'ocasione pro torrare a fàghere sa sagra de sa sìndria, un'apuntamentu importante intro sos atopos de promotzione de sos produtos de su territòriu de Arborea. Tocat a pretzisare, difatis, ca sa sagra de sa sìndria lompet ocannu a sa de 46 editziones.

Cunfirmada finas sa sagra de sa seada. Non est acabada, pro ite sa Pro Loco de Arborea at pensadu finas a sos giòvanos. Gosi, in su programma sos organizadores de sa duas dies ant peri allistadu un'atopu dedicadu a sa birra.

Est importante pretzisare ca pro aprontare sa festa sa comuna e sa Pro loco de sa bidda de su Campidanu ant àpidu s'agiudu de sa “Cooperativa Produttori Arborea”, de sa “Banca di Arborea”, de s'Assessoradu a su Turismu de sa Regione Autònoma de Sardigna, de sa “Fondazione Sardegna” e de sos sponsor.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22