28 de argiolas 2022: s'ùrtimu atopu de sa caminera “Costruiamo insieme un servizio di ristorazione scolastica di qualità e sostenibile”

In sa Mesa - “Laore Sardegna”, s'agenzia de sa Regione Autònoma de Sardigna chi sighit sos traballos asuba de sos programmas regionales chi atennent a sa massaria e a s'isvilupu rurale, paris cun s'ATS de sa ASSL de Crabònia e a sas comunas de Cabuderra, de s'Iglesiente, de su Linas e de su Sùrcis chi formant sa ATO 7, ant organizadu s'ùrtimu de unos cantos atopos chi ant àpidu comente tìtulu “Costruiamo insieme un servizio di ristorazione scolastica di qualità e sostenibile”.

Custos atopos fiant cumentzados in su mese de frèargiu coladu e sunt sighidos in martzu, maju e làmpadas. Su concluu de custa caminera s'at a isboligare su 28 de argiolas a sas 9:30.

Ma ite at pertocadu custu progetu? Tocat a sutalineare ca sos atopos, cumente si podet cumprèndere dae su titulu de su progetu etotu, ant pertocadu a unu servìtziu de mensa iscolàstica sustenìbile e de calidade arta. Pro sos organizadores de custos apuntamentos, difatis, sa mensa iscolàstica devet èssere sana ma finas atenta a su ligòngiu cun su territòriu suo. In prus de su chi amus naradu giai, in sas iscòlas de sa ATO 7 su servìtziu mensa devet àere un'àetra punna: sa sustenibilidade ambientale, sotziale e econòmica. Pro arribare a custos obietivos, però, at a tocare a fàghere un'apaltu chi at a àere sas iscolas comente protagonistas. S'apaltu at a atènnere sas mensas iscolàsticas chi ant a adotare màndigos biològicos, de calidade e a “Km 0”.

A custos atopos ant leadu parte finas babbos e mamas, maistos de s'iscola, frunidores de servìtzios, aziendas agrìculas, fatorias didàticas e asòtzios.

Sos atopos sunt istados fatos online pro mèdiu de sa prataforma ZOOM; finas s'apuntamentu de su 28 de argiolas at a èssere fatu online, ma chie cherret l'at a pòdere sighire in sa sede de sa Provìntzia de “SUD Sardegna”, in arruga Mazzini 39 in Crabònia.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22