“Sardinia Food Awards 2022”: sas paràulas de s'assessora Murgia asuba de s'agrualimentare sardu

In sa Mesa - S'agrualimentare de Sardigna rapresentat unu cumpartu de calidade e bantat produtos de primore. Sunt produtziones fatas cun matèrias primàrgias sincheras e màndigos chi ant raighinas in una traditzione ùnica e rica meda. Est custu su coru de cantu at naradu s'Assessora de s'Agricultura e Reforma Agrupastorale de sa Regione Autònoma de Sardigna Gabriella Murgia. S'ocasione est istada sa de sete editziones de sa manifestatzione “Sardinia Food Awards 2022”, realidade chi at promotzionadu sos màndigos de sa traditzione de s'ìsula.

Non est acabada inoghe, pro ite s'Assessora Murgia at finas pretzisadu ca in custu momentu istòricu tocat a sighire gosi, chircande de megiorare sa calidade de sos produtos e peri adotande carchi innovatzione chi siat capassa de dare valore a sas produtziones etotu.

In prus de totu, su chi est istadu sutalineadu dae s'Assessora de sa Giunta Solinas est ca est netzessàriu finas a nàrrere ca sa comunicatzione de custas realidades devet èssere un'ala importante in sa promotzione de s'agrualimentare de s'ìsula. Pro custa resone, pròpiu sa Regione Autònoma de Sardigna at detzisu de dare investimentos meda pro donare sa possibilidade a sas aziendas de su cumpartu de si promotzionare.

“Pro sas aziendas sardas est peri importante reunire sas realidades produtivas in sa filiera de s'agrualimentare”, at pretzisadu s'Assessora de s'Agricultura e Reforma Agrupastorale. In prus tocat a ammentare ca sa Regione Autònoma de Sardigna at fatu unu progetu importante pro su cumpartu, est a nàrrere su progetu “MenSarda”, chi tenet sa punna de promotzionare sos màndigos sanos gràtzias a su consumu de produtos tìpicos de sa traditzione alimentare locale. Bisòngiat a sutalineare, però, ca custu consumu, segundu sas ideas de su progetu etotu, devet èssere una abitùdine in sas mensas pùblicas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22