In Làconi torrat sa “Sagra del Tartufo”

In sa Mesa - In Làconi torrat sa "Sagra del Tartufo", una rassigna gastronomica chi fiat firma dae duos annos pro more de su COVID-19.

Una festa importante, sa chi s'at at isboligare su 19 de su mese de làmpadas chi at a bènnere, una manifestatzione chi ocannu lompet a sa de dòighi editziones.

Sa "Sagra del Tartufo" est organizada dae s' "Associazione Turistica Pro Loco" de Làconi e at sa punna de faeddare de s'importàntzia chi at sa tùvara pro s'isvilupu de su territòriu. Sa sagra, però, at a rapresentare finas s'ocasione pro tastare màndigos acumpridos cun custu produtu de su padente de Làconi, mescamente de su padente a curtzu dae Santa Suia, est a nàrrere de su tretu de terra in ue s'agatat prus tùvara. Tocat a pretzisare ca in Làconi s'agatat massimamente su "scorzone" ("tuber aestivum") o tùvara niedda de istiu, unu produtu chi coghet tra su mese de làmpadas e su mese de cabudanni. Semper e cando, in su sartu de Làconi s'agatant peri àteras ratzas de tùvara, mescamente su "bianchetto" o "marzuolo" ("tuber borchii"), chi creschet dae su mese de ghennàrgiu a su mese de abrile; su "Nero di Norcia (tuber melanosporum)", chi coghet a incumentzare dae sa fine de su mese de ladàmine, e in fines su "tartufo nero d'inverno" ("tuber brumale") chi si podet regollire dae su mese de ghennàrgiu a su mese de martzu.

Sa "Sagra del Tartufo 2022" s'at a isboligare in su tzentru istòricu de Làconi. In programma b'at a àere finas unu pràngiu cun màndigos fatos cun sa tùvara, cun pane, casu, frùtora, abba o binu. S'at a mandigare dae sas 13.00.

Sa manifestatzione at a incumentzare a sas 9.00 cun s'abertura de sos "stand" de enogastronomia e sos “stand” de artesanadu. A su matessi oràriu ant a incumentzare finas sas bìsitas ghiadas, mentras a sas 9.30 in su "Cineteatro De Andrè" s'at a isboligare su cunvegnu "Il tartufo sardo: tutela e valorizzazione". Ant a leare parte a su cunvegnu sos espertos de tùvara, sas istitutziones e sos assòtzios.

No est totu. Sa "Sagra del Tartufo 2022" de Làconi at pensadu peri a sos pitzinnos. A sas 17.00, difatis, at a incumentzare “Baby Fun”, cun ispetàculos e animatzione pro pitzinnos e famìlias.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22