"Girotonno": in Carluforti su Libanu binchet "Tuna Competition"

In sa Mesa - Su Libanu binchet sa "Tuna Competition" de "Girotonno" 2022, est a nàrrere sa "kermesse" internatzionale de Carluforti.

"Girotonno", lòmpidu a sa de degheoto editziones, onni annu "interessat gastronomos, 'chef', espertos de coghina de tonnina, giornalistas e espertos de gastronomia mediterrànea. Gosi, dae su 2 a su 5 de su mese de làmpadas coladu, difatis, Carluforti s'est trasformada in sa Capitale de sa tonnina de calidade. Ocannu su binchidore de sa "kermesse" est istadu unu "chef" libanesu, Richard Abou Zaki, chi traballat in su ristorante "Retroscena" de Porto San Giorgio, in provìntzia de Fermo.

Su binchidore de sa "Tuna competition" at afrontadu sa gara contra a sos "chef" de àteros tres Paisos: Itàlia, Giapone e Colòmbia.

Sa gara est istada interessante, nuscosa e de sabore e at fatu bìnchere su Libanu gràtzias a una retzeta fata cun tonnina ruja de Carluforti. Zaki at conchistadu sa vitòria cun sos votos de sa giuria tècnica, ma finas cun sos votos de sa giuria populare.

Sa classìfica at donadu su de duos postos a su "chef" de sa Colòmbia Jose Narbona Rodriguez. Rodriguez est "executive chef" in su ristorante colombianu de Milanu "Mitù". S'Itàlia otennet su de tres postos. S'istadu italianu est istadu rapresentadu dae sos "chef" sardos Davide Atzeni e Mauro Ladu. Atzeni est su "chef" e "patron" de Coxinendi, su ristorante chi s'agatat a dae in antis de su Casteddu de Seddori, in su coro de su Campidanu de Mesu, mentras Ladu est su "chef" e "patron" de s'osteria Abbamele de Mamujada, in provìntzia de Nùgoro. In fines, a su bator postos agatomus su Giapone cun sos "chef" Roberto Okabe e Shimpey Hirota. Okabe est su "chef "e "patron" de su ristorante milanesu "Finger's".

Tocat a pretzisare ca su prèmio ispetziale est tocadu a su pratu aprontadu dae su "chef" de sa Colòmbia Jose Narbona Rodriguez.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22