In su mese de trìulas su "Wine Experience Oschiri"

In sa Mesa - L’ant programmada pro sas primas duas dies de trìulas s’editzione noa, sa de bator, de sa "Wine Experience Oschiri", apuntamentu nàschidu movende dae su chi su binu ingendrat in contu de sotzialidade.

Comente narant sos organizadores, «sa Wine Experience Oschiri est su resurtu de unu grandu sentidu comunitàriu: su de s’atopare cara a una passione sintzera, che a sa de sa cultura de su binu, una intre sas dinàmicas sotziale prus galanas est. Wine Experience Oschiri – bi la sighint – est un’eventu ùnicu in su gènere suo: in su matessi logu, in su matessi momentu, s’ant a atopare sos espertos màssimos de s’enologia regionale e de sa natzionale, su mègius de sa produtzione enològica sarda, sas ùrtimas tendèntzias de su mercadu, sas novidades tecnològicas in chentina, su mundu de su binu 2.0 e, a concruos, sas chentinas ambassiadoras de su territòriu. Su sàbadu, in sa festa, ant a èssere 100 sas “top cantine” presentes in bidda. Sa punna est ambitziosa, ma cuncreta a su matessi tempus: contare su mundu de su binu valorizende sas produtziones de primore de su logu e dende boghe a sas tendèntzias noas de consumu».

Sede de s’editzione 2022 de sa "Wine Experience Oschiri 2022" est su Teatru Comunale chi nch’est in intro de unu palatzu istòricu. Ma no issa ebbia. A sero s’atopu est a probe de su lagu Coghinas e su sàbadu in intro de sa bidda.

«In prus de sa mannosidade de sas chentinas presentes – annanghent sos organizadores – a tretu de sighire e de pinnigare sos tempos e a costàgiu cun sas esigèntzias de sos consumadores e de unu mercadu mai firmu in s’evolutzione costante sua, cun sos canales noos de distributzione e una sotziedade semper prus digitalizada, b’ant a èssere sas etzellèntzias chi punnant a su mercadu sardu e a s’italianu e chi in sa Wine Experience agatant s’oportunidade issoro de visibilidade e unu logu ideale pro presentare progetos e realidades».

Su programma intreu inoghe.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22