Su benidore de s'"Agnello di Sardegna IGP"

In sa Mesa - S'"Agnello di Sardegna IGP" abbàidat a su benidore cun solutziones alimentares noas. Custu màndigu, difatis, at sa capatzidade de èssere perfetu cando est acumpangiadu cun àteros produtos sardos; in prus est una petza chi si pòdet batire in sa mesa totu s'annu, siat in sa mesa de domo siat in sa mesa de sos ristorantes. A lu nàrrere, in sa fiera internatzionale de Parma "Cibus", est su rapresentante de su "Consorzio di Tutela dell'Agnello di Sardegna IGP".

In sa fiera fiat presente finas su "chef" Salvatore Polo de  Otieri, chi s'agatàt in Parma pro fàghere bìdere e tastare "in direta" sa petza de angione sarda, una petza perfeta siat in sos pratos traditzionales siat in sos pratos modernos, comente sas "tartare", sos "arrosticini" e sos "hamburger".  

Sa valorizatzione de sa petza de angione est incumentzada a pustis de àere istudiadu unos cantos produtos chi podent ismanniare s'oferta de su consumu de s "agnello IGP di Sardegna". A lu pretzisare est istadu su rapresentante de su "Consorzio di tutela dell'Agnello di Sardegna IGP".

Tocat a nàrrere ca sos trasformadores ant pensadu a satisfàghere sos "buyer" e sos bisitadores, mentras su "chef" de Otieri Salvatore Polo at pensadu a acuntentare sos palados.

In sa fiera "Cibus" Polo at difatis traballadu pro dimustrare ca custa petza si podet acrobare a produtos sardos diferentes. Est gosi chi sunt naschidas: sa "tartare" iscabetzada in base alcòlica cun mele, cannonau, birra ruja, abbardente e cun sos nuscos sardos comente su tumbu, sa sàlvia, su tzìpiri; sos ciciones cun bagna de petza de angione e "greviera" de Otieri e àteras licanzias de non perdere.

Sos de su "Consorzio di Tutela dell'Agnello di Sardegna IGP" sutalineant ca "si traballat pro permìtire a sa petza de angione [...] de satisfàghere a sos bisòngios de una platea de consumadores  chi est una platea internatzionale". Est pro custa resone chi su  "Consorzio di Tutela dell'Agnello di Sardegna IGP" proponet fòrmulas noas chi ant a serbire pro valorizare custu produtu.

Sunt fòrmulas chi non faghent dannu a sa calidade de sa petza e chi in su matessi tempus agiudant a su consumu e a sa realizatzione de sas retzetas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22