A pustis de duos annos de pasu est pronta sa de tres editziones de CalaBeer

In sa Mesa - A pustis de duos annos de pasu pro more de sa pandemia, sa Marina de Thiniscole (La Caletta) est pronta pro sa de tres editziones de CalaBeer, eventu nòdidu pro sos produtores e pro sos amantiosos de birras artesanales de Sardigna.

Pro s’apuntamentu, sos de s’assòtziu Kawham, finamentas ocannu ant seberadu sa data de su primu de maju. E finamentas pro custa editzione su tretu de sas espositziones est su chi movet dae sa pratza de su portu interessende parte manna de carrera de Nazario Sauro, sa printzipale de sa fratzione.

«Che a cada annu – gosi sos promotores – sa punna nostra est sa de dare vàllia a sa data de su primu de maju pro mèdiu de un’eventu chi nch’est oramai in intro de sa programmatzione territoriale. Sa birra artesanale fata in Sardigna presentada dae sos mègius produtores – annanghent – at a èssere sa protagonista e, in pare cun issa, b’ant a èssere sas fainas de primore de sos artesanos de su logu».

De custa manera sas postatziones de sos noe birrifìtzios s’ant a intreverare cun sos puntos de sas atividades produtivas thiniscolesas. E no ant a mancare nemmancu sos puntos de informu de s’assòtziu organizadore pro indiritzare sos chi ant a acudire a s’apuntamentu e pro lis fàghere connòschere finamentas àteras prendas de custu chirru baroniesu infustu dae su Tirrenu e bardiadu dae su monte Arvu.

A comintzu de sa manifestatzione, a banda de mangianu, b’at a èssere su cunvegnu “Ripensare gli eventi dopo la pandemia” cun sa presèntzia de sos assessores comunales de sa Cultura de su territòriu, sa rete de impresas de La Caletta e sos professionistas de su setore de sa progetatzione de bandos. S’eventu comintzat a sas 10; a sas 11.30 su cunvegnu; dae sas 15 mùsica. Custos sos produtores de birra presentes: Isola (Tiesi), Santu Jorgi (Bitzi), Marduk (Irgoli), Reforte (Benetuti), Centoteste (Tortolì), Harvest (Casteddu), Trulla (Nùgoro), Birrificio d'Ogliasta (Baunei), Triulada (Pasada).

Attività realizzata col contributo della Regione Sardegna - IMPRENTAS 2021-2022. LR 22/2018, art. 22