Tres isteddos "Michelin " pro sa cantina Su 'entu

In sa Mesa - Su 20 de martzu de su 2022 sos tres isteddos "Michelin” Camedda, Stara e Sadler ant a èssere presentes in sa cantina Su 'entu de Seddori. Una presèntzia importante si pensamus ca sa "Guida Michelin" rapresentat una tra sas referèntzias prus mannas pro sa valutatzione de sa coghina de calidade.

S'adòbiu cun sos tres isteddos aprontadu dae sa cantina Su 'entu est su resurtu de su traballu fitianu fatu dae Roberta, Valeria e Nicola Pilloni, sos meres de sa realidade produtiva seddoresa nàschida dae unu progetu de su babbu.

Pro afestare sos tres chef, Valeria, Roberta e Nicola ant organizadu su de duos adòbios cun "Le Stelle in Marmilla". Difatis, Camedda, Stara e Sadler, paris cun Stefano Deidda de su ristorante "Dal Corsaro" de Casteddu e Italo Bassi de su ristorante "Confusion" de Poltu Celvu, in die de oe faghent artziare su nùmeru de sos isteddados de s'ìsula.

In Seddori Camedda, de su ristorante "Somu" de Altzaghèna; Stara, de su ristorante "Fradis Minoris" de Pula; Sadler, de su ristorante "Gusto by Sadler" de Santu Tiadòru de Uviddé, ant a èssere sos protagonistas de una die dedicada a sos màndigos, a su binu e sa filiera curtza de su territòriu.

In sa primu editzione de "Le Stelle in Marmilla", fiant istados sos chef Deidda e Bassi a ai delissiadu su paladu de su pùblicu, mentras in s'editzione 2022 sos rifletores sunt pro sos tres "new entry" de sa "Guida Michelin". Gosi, Camedda, Stara e Sadler ant a coghinare paris cun sos dischentes de "COI Accademia Enogastronomica".

Su programma de "Le Stelle in Marmilla" at a cumentzare dae sas 13.00, candu s'at a isboligare su "Street food Stellato", chi at a èssere acumpangiadu de sos binos biancos e nieddos de sa cantina Su 'entu.

Sos segretos de sos pratos de sos tres chef isteddados ant a èssere isvelados gràtzias a una filera de intervistas a incuru de sos giornalistas Roberto Sanna, Ivan Paone e Giulia Salis.

A pustis at a sighire s'adòbiu "Dalla vigna alla cantina", tastos e aprofundimentos cun s'agronomu de Su 'entu Gianluca Ventroni, su giornalista Roberto Ripa e sa produtora Roberta Pilloni.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22