Pompia e cosmesi in sa fiera “Agrumi” de su Fai

In sa Mesa - De sa pompia est oramai dae tempus chi si nde faeddat a dae chi est unu intre sos prus caraterìsticos agrumes sardos. Groga che a unu limone, simigiante a su tzedru mancari siat prus larga chi non longa, a s’ispissu caribrunconosa, issa creschet in arboreddas semperbirdes de duos o tres metros chi frorint dae su mese de martzu a su de maju.

Pranta tìpica de sa Baronia de Thiniscole, si narat chi nche potzat èssere lòmpida a custos tretos a pustis de sos biàgios orientales de Lisandru su Mannu. Su bonu de sos sardos, e non de sos sardos ebbia, la connoschet pro more de unos cantos produtos eno-gastronòmicos prus chi non licantzos: sa pompia intrea, candida cun su mele; s’arantzata (iscritu a sa baroniesa, sena lenitzione); sa marmellada; su licore otènnidu dae su “corju”. Ma su còrgiu, o mègius, s’ògiu essentziale suo, tenet finamentas propiedades «anti-inframatòrias, anti-micòticas, anti-batèricas, disinfetantes e tzicatrizantes». Est su chi amus pòdidu lèghere in s’informativa de unu de sos esponidores presentes su mese coladu in sa fiera milanesa “Agrumi” promòvida e organizada dae su Fai (“Fondo ambiente italiano”).

S’azienda tataresa Phareco, impresa derivada (est a nàrrere una “spin off”) de s’Ateneu turritanu, at presentadu sos produtos suos de sa lìnia P-Med (P comente pompia) sighende a “isdoganare” s’agrume baroniesu in su mercadu de sos cosmèticos.

Sa faina, difatis, non naschet oe: su Comunu de Thiniscole, carchi legisladura a como, aiat firmadu unu protocollu de intesa cun s’Universidade e, de custa manera, sos de su Dipartimentu de Iscièntzias bio-mèigas ant cumintzadu a nde bogare s’ògiu pro mèdiu de sa distillatzione a vapore.

Sos produtos derivados (cremas, detergentes, collutòrios) pertocant sa detersione e su tratamentu de sas zonas ìntimas, s’igiene de sa cavidade orale, su tratamentu de sa pedde, de sa cara e de sa carena. Sa chirca universitària impuntzada conduida dae sa professora Grazia Fenu Pintori est como una realidade chi nche faghet lòmpere sa pompia dae s’àrbore a sas potecarias. Duncas no in sa mesa ebbia.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22