Durches, pane e decoros dae Thiniscole a Marina de Massa

In sa Mesa - Su fine de chida coladu, in sa Fiera de su Tirrenu de Marina de Massa, sa Fipgc ("Federazione italiana pasticceria, gelateria e cioccolateria") at organizadu sos campionados italianos de arte culinària decorativa. Intre sos protagonistas finamentas sa mastra durchera thiniscolesa Graziella Frau chi, dae su 4 a su 6 de martzu, at mustradu a sos presentes sas abilidades suas.

S’aventura sua est comintzada chenàbura cando, in pare cun àteros decoradores e "cake designer" de àteros logos de s’istadu italianu (59 in totu), at contribuidu a s’ammàniu de una turta monumentale de tres metros de artària. «Sa parte prus imponente – narat Frau – fiat sa chi nch’amus postu in mesu, una riprodutzione de unu faru fata dae sa campiona mundiale de "cake design" Maria Concas, fìgia de unu sardu, chi nch’istat in Torinu». Issa, Graziella, in custa turta, movende dae su mare de su litorale suo, dae sas dunas de Capu Cuminu e dae sa praja de Bèrchida, at fatu imbetzes un’àncora de 70 tzentìmetros, unu timone, pisches e àteras riprodutziones de criaduras marinas. «Simpres e naturales los apo lassados – agiunghet sa mastra durchera – e sena colores: prendas cun decoros fatos a minudu boghende a campu àghina, rosas, ispigas totu inghiriadu dae una randa macramè».

Como, gràtzias a s’impinnu suo, Frau est parte de s’"équipe" de sos "cake designer" italianos de primore.

Su die a pustis issa at presentadu unos cantos durches sardos de su connotu, comintzende dae sos Pretziosos a sa pompia (nd’amus a faeddare a banda) e ammustrende a sos presentes s’arte sua de decorare petzi cun una lepighedda.

Ma est domìniga su 6 chi Frau est artziada a su pòdiu conchistende una medàllia de prata. Mancari apat pigadu parte a su cuncursu Fipgc cun unu pane a sa pompia, sa giuria chi l’at premiada at disinnadu de avalorare su pane artìsticu cun decoros a chèntinas: 164 aplicados in sa parte superiore, 120 in sa de bassu e 60 bogados dae su pane matessi.

A sos giùghes, Graziella Frau lis at presentadu s’òpera sua assentada subra de un’ispigru pro chi donaret lughe a totus sos decoros presentes in su pane. «Apo semper sighidu sos inditos e sos imparos de mannedda – serrat Graziella Frau -  e mai mi la podia crèere, a 54 annos, de pòdere rapresentare sa Sardigna in sos campionados italianos. Est una vitòria chi dèdico a sa famìlia mea, a sos dischentes meos e a issa, a mannedda, sa prima a mi nche pònnere sa farina in manos».

Attività realizzata col contributo della Regione Sardegna - IMPRENTAS 2021-2022. LR 22/2018, art. 22