Bosa: su cunvegnu "Malvasie di Sardegna. Vini antichi per un mercato moderno"

In sa Mesa - S'est isboligadu su 4 de su mese de martzu in Bosa su cunvegnu "Malvasie di Sardegna. Vini antichi per un mercato moderno". S'adòbiu bosincu, aprontadu dae "Confindustria Oristano", at àpidu tra sos protagonistas suos: su Cunsòrtziu, sos produtores e sos espertos. Presente finas s'assessora regionale de s'Agricoltura e Reforma Agro-Pastorale Gabriella Murgia.

"Malvasie di Sardegna. Vini antichi per un mercato moderno" at àpidu sa resèssida previdia. Difatis in Pranarza s'est isboligada est una dibata de interessu mannu supra su benidore de sa Malvasia, sa bide chi dae sèculos meda at caraterizadu sa produtzione de binu de calidade in sa Sardigna tzentru-otzidentale.

Su cunvegnu at dadu a bìdere s'esèmpiu virtuosu de Mamujada, siat pro cantu pertocat a s'isvilupu econòmicu siat pro cantu pertocat a su turismu.

In Pranarza sunt sete sas comunas chi faghent Malvasia DOC. Sunt: Bosa, chi presentat sa superfìtzie prus manna de terrinu coltivadu cun custa ratza de bide; Mòdolo; Tresnuraghes; Magumadas; Sune; Frussio e Tinnura. Dae sos terrinos de custas comunas si bogant 16.100 litros de Malvasia de calidade. Tocat a pretzisare ca 150 sunt sos eto-litros bèndidos in ampulla. Custos nùmeros ant a pòdere crèschere si si càstiat a realidades chi sunt esèmpios virtuosos, realidades in ue su binu at dadu s'impèllida pro s'isvilupu de comunidades sena de aficu pro su benidore.

Tra sos modellos resèssidos s'agatat su de Mamujada, chi at aunidu agrualimentare, traditzione, turismu e acasàgiu. Duncas, abbaidende a custu modellu, si sas produtziones sighint progetos fatos bene, sa Malvasia de Bosa at possibilidades mannas e importantes.

"Sa Regione Autònoma de Sardigna - at pretzisadu s'assessora Murgia - at postu a campu interventos pensados pro afortigare sa redditividade de sas aziendas, pro favorèssere s'unione de sos produtores e finas pro valorizare sa calidade e sa sustenibilidade de sas produtziones".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22