Tres reconnoschimentos importantes pro "Agricola Monte Arci"

In sa Mesa - Su nùmene suo est "Agricola Monte Arci". S'agatat in su territòriu de Marrùbiu, in sa provìntzia de Aristanis, e est una realidade produtiva chi in sas ùrtimas chidas amus sentidu numenare bortas medas pro ite at bìnchidu unos cantos reconnoschimentos importantes in su campu de s'agroalimentare.

In su mese coladu, difatis, s'"Agricola Monte Arci" at leadu parte a s'editzione de su 2021 de su cuncursu "Grandi Mieli d'Italia Tre Gocce d'oro", una manifestatzione chi pertocat a sa calidade de su mele e peri una manifestatzione chi est famada in totu su mundu pro ite premiat sos produtos de primore nàschidos dae s'allevamentu de sas abes. Ma cale est istadu su resurtu finale de custu cuncursu? Pro s'azienda agrìcula marrubiesa sunt arribados sa bellesa de tres reconnoschimentos: unu pro su mele de mudregu, chi at otentu sas "due gocce d'oro", unu pro su mele "millefiori" e unu pro su mele de cardu chi ant otentu "una goccia d'oro" cadaunu.

S'"Agricola Monte Arci" est nàschida in su 1997, cando Orlando Oliva, su mere de s'azienda, at detzìdidu de cumentzare cust'atividade paris cun sa mugere Roberta. Ambos aiant frecuentadu unu cursu de un'annu chi lis aiat permìtidu de imparare a allevare sas abes e peri sas tècnicas de produtzione de su mele a manera professionale.

Dae s'impignu de Orlando e de Roberta sunt nàschidos unos cantos produtos. S'"Agricola Monte Arci", difatis, non produit mele ebbia, pro ite in s'azienda marrubiesa dae s'allevamentu de sas abes naschent àteras produtziones ispetziales. Sos esempros sunt unos cantos. Tra custos s'agatant sa crema pro sas manos e pro su corpus fata cun sa chera de sas abes; s'abamele, est a nàrrere sa saba de mele; e peri sas caramellas, chi sunt fatas cun su mele produidu de sas abes allevadas.

Sa domo de S'"Agricola Monte Arci" s'agatat a peales de su Monte Arci, in localidade Is Bangius.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22