"Agnello di Sardegna": nàschidu, pesadu e bangadu in Sardigna

In sa Mesa - Nàschidu, pesadu e bangadu in Sardigna, s'"Agnello di Sardegna" est unu produtu IGP (est a nàrrere cun marcu "Indicazione Geografica Protetta"), chi derivat dae sas berbeghes de late de ratza sarda e est pesadu in su sartu, duncas in un'ambiente naturale.

S'angione IGP devet respetare sas normas chi s'agatant in su disciplinare de produtzione e identificatzione, ma tocat a pretzisare finas ca s'"Agnello di Sardegna" podet èssere allevadu in totu su territòriu sardu, pro ite totu s'ìsula est idònea a otènnere unu produtu de calidade comente lu cheret su disciplinare.

Su CON.T.A.S., est a nàrrere su "Consorzio per la tutela dell'IGP Agnello di Sardegna" tutelat s'angione sardu. Su Cunsòrtziu at finas su còmpitu de promovere s'angione, de informare su comporadore, de valorizare su produtu e de atèndere a sos interessos chi pertocant sa denominatzione IGP. Su CON.T.A.S. est fatu de operadores econòmicos chi faghent parti de sa filiera produtiva regionale de sas berbeghes.
S'"Agnello di Sardegna IGP" incluit tres tipologias de agione: s' "Agnello di Sardegna IGP da Latte"; s'"Agnello di Sardegna Leggero" e s'"Agnello di Sardegna da Taglio".

S'"Agnello di Sardegna IGP" devet àere unu pesu tra 4,5 e 8,5 kg e est sustentadu cun su late de sa mama. S'"Agnello di Sardegna Leggero", imbetzes, est una bestia chi devet àere unu pesu dae sos 8,5 kg a sos 10 kg, mentras su pesu de s'"Agnello di Sardegna da Taglio" devet èssere incluidu intre 10 e 13 kg. S'"Agnello di Sardegna Leggero" e s'"Agnello di Sardegna da Taglio" derivant de s'acrobamentu de sa berbeghe sarda cun su mascru berbeghinu “Ile-de-France” e “Berrichon-du-chere” o peri cun àteras ratzas ispetziales.

Sos angiones idòneos a sa produtzione de s'IGP sunt marcados dae sos pastores cun unu marcu birde in s'origra. Custu marcu distinghet s "Agnello di Sardegna IGP" dae sos angiones chi non sunt insertados in su sistema de tzertificatzione IGP.

Totu sa petza de s'angione IGP at un'eticheta chi at su marcu de su Cunsòrtziu, su marcu IGP, sa categoria, sa denominatzione de sa parte e s'istabilimentu in ue s'angione est istadu ochidu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22