Publicadu su bandu de su "Premio Ozieri"

Publicadu su bandu pro sa de 66 editziones de su cuncursu literàriu “Premio Ozieri”. S'iscadèntzia previdida su 31 de maju.

Su “Premio Ozieri” est riservadu a sas poesias e a sos contos in limba sarda e in sas àteras limbas de Sardigna (gadduresu, turritanu, catalanu de S’Alighera e tabarchinu). Pro pòdere leare parte a su bandu tocat a imbiare cumponimentos inèditos.

Sas òperas las at a valutare sa Giuria ghiada dae su professore de de s’Universidade
de Tàtari Dino Manca. Su professore at a èssere “acumpangiadu” dae s’iscuadra sua. Cun Manca b'at a èssere Anna Cristina Serra (vitzepresidente), Cristiano Becciu, Antonio
Canalis, Duilio Caocci, Clara Farina, Attilio Mastino, Riccardo Mura, Gianbernardo Piroddi, Simone Pisano, Gabriele Tanda, Salvatore Tola.

“Su cussìgiu pro sos autores - sutalineat sa nota de s'assòtziu 'Premio Ozieri Aps' - est su de sighire sas règulas ortogràficas de su prèmiu Otieri chi sunt publicadas in su situ web de s’assòtziu omònimu de promotzione sotziale; pro sas òperas iscritas in sas limbas minoritàrias turritana, gadduresa e tabarchina sunt inditadas sas normas istandard issoro aprovadas dae sa Regione Sardigna; pro s’aligheresu sas normas adotadas dae su Comune”.

No est totu. S’assòtziu Premio est aprontende unu calendàriu prenu de manifestatziones a costàgiu de su cuncursu pro promòvere e ispainare a 360 grados sa cultura e s’arte de sa Sardigna.