"Barrinas de Sardigna": unu cunvegno po fai craresa

(IlMinuto) – Casteddu, 28 de su mesi de totussantus - Su cunvegnu "Barrinas de Sardigna" si presentat comenti su primu tentativu de fai craresa asuba de is permissus de circa de "idrocarburi" in s'ísula. A ddu aprontai in Seddori, in is aposentus de s'ex "Montegranatico", in data 1 de su mesi de paschixèdda a is 15.30, est su Comitau Cívicu "No a su Progetu Lianora". In s'atopu s'at a fueddai de su progetu Lianora, ma de su progetu cróbinu puru chi, torrau a batiai "Igia", previdit unu tretu de cumpudada de 187 Kmq in su Campidanu de Mesu. "Barrinas de Sardigna" at a ponni s'atzentu asuba de is duus permissus a mari pedius de sa Saras spa - agoa arreusaus de su Ministeru de s'Ivilupu Económicu - e asuba de su permissu de 687 kmq ororu a is costeras de su Sinis e de propriedadi de sa Puma Petroleum. "Cali is arriscus - si dimandant is aprontadoris de s'avenimentu - chi si currint ponendi in Sardigna atividadis de bogadura de custu tipu?" E galu: "Is tzitadinus funt informaus de sa possibilidadi chi acanta de domu insoru iant a podi nasci putzus 'estrattivi' o tzentralis de arrefinadura?" "Comenti s'unit sa punna naturali a su turismu de is costeras sardas cun sa preséntzia de arrepranus petroliferus a pagus míglius de sa costera?". A custas preguntas ant a circai de arraspundi, fadendu craresa asuba de sa situatzioni, Vincenzo Migaleddu, méigu radiologu e presidenti de Isde Méigus po s'Ambienti-Sardigna; Pietro Dommarco, giornalista de "Altreconomia" e autori de su líburu inchiesta "Trivelle d’Italia" e Massimo Dadea, méigu i ex Assessori regionali de is Afàrius Generalis.

Fotografia de lorydieffe. Pigada de Flickr