“Unu referendum po s’indipendentzia de sa Sardigna”, cumentzat s’arregorta de is firmas de Malu Entu. Is dúbius de ProgRes e aMpI

(IlMinuto) – Casteddu, 16 de su mesi de gennàrgiu - "Ses de acórdiu comenti bófiu de su diritu de is Natzionis unias a sa conchiasta de sa libertadi de su pópulu sardu cun s'indipendentzia?". Cun custus fueddus sàbudu passau est stétiu presentau, in d-una cuferéntzia de imprenta in Casteddu, su referendum po s'indipendentzia promòviu de su movimentu Paris–Malu Entu. Intre pagus diris at cumentzai s'arregorta de is firmas po su referendum promòviu - est stétiu acrarau in sa cuferéntzia - asuba de su printzípiu giurídicu e políticu de sa "soverania de is pópulus". No totus is fortzas indipendentistas pentzant perou ca is tempus siant cumprius po una votatzioni de custu importu. Po Progetu Repùblica su referendum depit essi atzipau de su fàbricu de sa cuscéntzia natzionali. "Sus biendi - scririt ProgRes – cun apinnicu propostas autónomas chi arriscant de andai contra a su protzessu (de fàbricu de sa cuscéntzia natzionali, ndr), e de ddu stentai e de ddu fai cumpàrriri unu fenómenu folkloristicu". Puru a Manca pro s’Indipendentzia est crítiga a faci de s'idea de Malu Entu. "Sa manca indipendentista sarda - si ligit in d-una nota de imprenta - pentzat ca unu referendum chentza de apariciu e ghiau chentza de s'imprastu giustu e in auséntzia de acórdiu potzat intacai s'atuamentu de is arrisurtaus otentus fintzas a imoi de su movimentu de liberamentu natzionali de sa Sardigna".