Sa "Trattoria Margherita" de Arborea in sa "Guida Bib Michelin"

In sa Mesa - Sa "Trattoria Margherita" de Arborea est intrada in sa "Guida Bib Michelin". Su ristorante, difatis, est tra sos 29 “Bib Gourmand” noos. Una "new entry" de sa "Guida Michelin", duncas, chi pro mèdiu de su sìmbolu s'"Omino Michelin" faeddat de un'esperièntzia gastronòmica licantza, barata e de calidade.

Ma cale est s'ingrediente ispetziale chi at fatu intrare in sa ghia sa "Trattoria Margherita" de Giacomo Cossu? Sa risposta est sèmplitze comente sos ingredientes segretos chi l'ant dadu su reconnoschimentu, est a nàrrere: s'amore pro sa coghina e sa chirca de matèrias primàrgias sincheras e de calidade.

Aberta dae chimbe annos pagu prus o mancu, sa "Trattoria Margherita" cheret èssere unu donu chi Giacomo Cossu faghet a sas raighinas suas. Semus faeddende de sas giajas suas, chi aiant comente nùmene Margherita. Ambas l'ant trasmitidu s'amore mannu pro sa coghina e pro sa chirca sena de pasu de sa calidade. No est pro nudda ca Cossu at dedicadu a sas giajas suas custa bìnchida. L'at sutalienadu fina a s'Ansa.

Ma chie sunt sos "chef" chi ghiant sa coghina de sa "Trattoria" e chi paris a su mere ant fatu bolare su nùmene de su ristorante? A ghiare sa coghina de sa "Trattoria Margherita" sunt duos frades: Fabio e Alessandro Marongiu, e est finas gràtzias a issos e a su traballu issoro chi oe est lòmpidu custu reconnoscimentu de importu mannu.

Unu menu ricu e interessante, su de sa "Trattoria". Sa proposta de sos "chef" Fabio e Alessandro, difatis, ponet paris sas retzetas de sa traditzione sarda cun sas retzetas de sa traditzione de sa Toscana, de su Làtziu e de s'Emìlia Romagna. Duncas, su de su ristorante de Arborea est unu menu chi nos contat sa coghina de realidades culturales diferentes e chi, feti pro fàghere un'esèmpiu, aunit sos culurgiones a sa "pasta alla Gricia", a sas "pappardelle al ragù di lepre" e a sos "Balanzoni Verdi". Totu est a Km0 e sighit su chi proponet s'istajone.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22