Noe ofellerias sardas in sa "Guida Gambero Rosso"

In sa Mesa - Cun 620 locales retzensidos in totu s’istadu italianu, Gambero Rosso at presentadu sa "Guida 2022 Pasticceri & Pasticcerie", cun classìficas a una, a duas o a tres turtas cunforma a su puntègiu otènnidu. Peruna etzellèntzia in Sardigna, est a nàrrere peruna ofelleria cun tres turtas. Ma sunt noe – una in prus de s’annu coladu - sas chi nd’ant pigadu duas, e duncas cun resurtadu “òtimu”. Cun 86 puntos agatamus a "Ditrizio Pasticceria” de Casteddu; una cunfirma, a dae chi su 2022 Piero Ditrizio retzeit su tìtulu de “pasticcere emergente”. Mantenent imbetzes su matessi resurtadu, 85 puntos, “Roberto Murgia Dolci” de S'Alighera, “Chez Les Negres” de Casteddu e conchistat unu puntu, dae 84 chi fiant, “La Piemontese”, fintzas issa in su cabu de logu sardu. Nch’abarrat in sa matessi positzione “La Dolce Vita” de Ilartzi, cun 84 puntos e colat a 81 “Sechi dal 1906” de Tàtari. Torrant a cunfirmare su resurtadu de su 2021, cun 80 puntos, “Il cigno Bianco” de Figari e “Lu Pasticciu” de Porto Cervo.

Ocannu in sa "Guida" b’agatamus finamentas a “Dulcis”, semper de Casteddu. Ma no est totu: intre sos mègius maistros turteris de Itàlia b’at fintzas unu sardu: Marco Pinna, aligheresu de su "Seta By Antonio Guida” de Milanu.

Pro otènnere sas tres turtas b’at unu decàlogu de sos giùighes chi, pro valutare mègius ant bisitadu sos locales in su momentu de s’oferta sa prus cumpleta (in gènere a banda de mangianu a concruos de chida). Valutados fintzas àteros elementos comente s’ambiente, s’espositzione de sos produtos, s’assortimentu, s’innovatividade de s’ofelleria, sos prejos, sas proas de assàgiu (unu produtu de ismùrgiu, unu produtu sicu e unu friscu), sa professionalidade de su personale, sas caraterìsticas de su confetzionamentu e, dulcis in fundo, sos binos de dessert chi mai devent mancare in un’ofelleria.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22