“Merano Wine Festival”: medallia de oro a su Cagnulari Recònta

In sa Mesa - Dae sa Sardigna a su cuncursu enologico internatzionale "Merano Wine Festival 2022". Su binu nieddu "Cagnulari Recònta" de sa cantina "Santa Maria La Palma" de S'Alighera faghet unu biàgiu vitoriosu e batit a domo bator prèmios; tra custos sa medàllia de oro, unu reconnoschimentu importante riservadu feti a sos binos de primore.

In prus de sa medàllia de oro, sa cantina "Santa Maria La Palma" batit a domo àteros tres prèmios. In totu, duncas,s'aziensa binchet bator prèmios.

Acanta a su binu nieddu "Cagnulari Recònta" agatamus àteras tres etichetas de sa cantina "Santa Maria La Palma". Sunt ampuddas chi ant otentu unu reconnoschimentu ispetziale. Semus faeddende de su binu "Ràfia", de su binu "Redìt" e de su binu "Akènta Cuvée", chi ant batidu in Sardigna sa medàllia ruja, prèmiu ispetziale chi est riservadu feti a sos binos de livellu prus artu.

"Custos prèmios importantes - sutalìneat s'azienda a s'ANSA - rapresentant unu reconnoschimentu de importu e dant atentzione a sa calidade de sas bìngias e de su 'terroir' de Sardigna", elementos chi andant summados a su traballu de sos 300 sòtzios nostros".

"Sas medàllias retzidas dae sa 'Cantina Santa Maria La Palma' premiant - sighit s'azienda - s'impignu de su 'team' nostru, ma in su matessi tempus sunt unu signale craru chi sutalineat ca sa calidade de sa produtzione de sas bìgias sardas creschet a manera costante gràtzias finas a sa capatzidade e a sa professionalidade de unu nùmeru mannu de aziendas. Capatzidade e a professionalidade in Sardigna s'aunint a unu territòriu ùnicu, fatu pro sa coltivatzione de sa bide". Evidèntziat s'azienda ca "sa Sardigna est a beru s'ìsula de su binu".

S'azienda aligheresa como est ingimiriada a promotzionare sas novidades suas. Tra custas b'est sa gràfica noa de etichetas istòricas de importu mannu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22