In Gaddura sa manifestatzione “Benvenuto Vermentino”

In sa Mesa - Sa Gaddura inchigiat "Benvenuto Vermentino", una manifestatzione lòmpida ocannu a sa de oto editziones, un'apuntamentu importante chi ponet in mustra sos binos de primore de sa terra gadduresa.

Acasagiat sa manifestatzione sa tzitade de Terranoa, chi dae su 17 a su 23 de su mese de ladàmine at a abèrrere unu calendàriu ricu de addòbios.

"Benvenuto Vermentino" est pensadu e promotzionadu dae sa "Camera di Commercio di Sassari-Nord Sardegna" e dae s' "Azienda Speciale Promocamera" cun s'agiudu de sa Comuna de Terranoa, de su "Consorzio di Tutela del Vermentino di Gallura", de sos assòtzios de categoria de su logu e de s'Ais.

Su de "Benvenuto Vermentino" est unu programma ricu e interessante, chi s'at a isboligare in sa "Settimana del Vermentino" cun initziativas promotzionales e culturales chi ant a àere comente "fil rouge" su binu chi est rei de Gaddura, est a nàrrere su Vermentinu, in sa denominatzione de "Gallura Docg" e de "Sardegna".

Cun sa ghia de s' "Ente camerale" e de "Promocamera", sos assòtzios de categoria ant a pònnere in òpera addòbios de animatzione urbana chi ant a interessare sas cantinas produtoras de Vermentinu, sas realidades produtivas de Terranoa, albergos e ristorantes.

A indanimare "Benvenuto Vermentino" b'ant a èssere bìsitas ghiadas in sas cantinas, tastos, menu tìpicos chi ant a àere comente tema su Vermentinu, mustras de artesanadu artìsticu e laboratòrios "open food". No est acabbada inoghe. Su programma, difatis, previdit peri addòbios B2B tra sas cantinas de Vermentinu e un'issèberu cualificadu de importadores foranos chi ant a lòmpere dae Germània, Isvìtzera e Danimarca. Ant a èssere addòbios chi ant s'obietivu de afortiare sas atziones de comunicatzione, "marketing" e promotzione turìstica in Gaddura.

Faghet parte de sa manifestatzione finas su "Premio nazionale eno-letterario Vermentino".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22