Su panetone mègius de Sardigna est de Terranoa

In sa Mesa - Su panetone mègius de Sardigna lu faghent in Terranoa. Lu produit s'ofelleri Emanuele Raimondo Dessena, mere de sa "Pasticceria Caffetteria Latte e Miele" e de su laboratòriu "Pasticceria Dessena" de Terranoa.

A decretare sa vitòria de s'ìsula est su "Panettone Day" de Milanu, lòmpidu ocannu a sa de deghe editziones. S'addòbiu milanesu, chi s'est isboligadu in su ristorante de su "chef" Carlo Cracco, est nàschidu cun sa punna de premiare su mègius panetone màstrinu de calidade. Sa chirca, duncas, est indiritzada a unu produtu de primore.

In su "Panettone Day", in prus de sos prèmios natzionales sunt istados atribuidos finas reconnoschimentos a sos produtos locales de calidade. Gosi peri unas cantas regiones ant otentu prèmios importantes.

A bìnchere su prèmiu pro su panetone est istadu in Sardigna pròpiu Dessena, chi at cunsighidu su mentovu pro su "Miglior panettone artigianale". Pro s'ofelleri terranoesu custa est istada sa de duas finales chi l'at bidu protagonista.

Cun su sabore suo su panetone de Dessena at delissiadu sos palados de sos giughes chi l'ant incoronadu comente panetone mègius de Sardigna. Semus faeddande de un'ofelleri chi binchet sa gara sua contra a 175 ofelleris lòmpidos in Milanu dae onni cugione de sa penìsula.

Dessena at batidu in gara duos panetones, unu in sa categoria "creativa" e s'àteru in sa categoria "tradizionale". At bìnchidu su prèmiu su panetone de sa categoria "tradizionale", unu durche chi at unu sabore clàssicu, unu sabore chi no intrinat. Ma comente est su panetone clàssicu de Dessena? Est unu durche sèmplitze fatu cun pabassa e aràngia candida.

Tocat a sutalineare ca sa de s'ofelleri de Terranoa est un'aventura incumentzada in su mese de làmpadas, cando Dessena at mandadu su panetone suo a sa giuria de su "Panettone Day". Da in cue est lòmpidu a sa finale, e dae sa finale a su pòdiu. Paris cun Dessena sunt istados premiados cun targas e peddecaminos àteros 23 ofelleris italianos.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22