Ollasta afestat sa de 20 editziones de sa sagra de sos legùmenses

In sa Mesa - Est totu prontu in Ollasta pro sa de 20 editziones de una manifestatzione gastronòmica meda ispetziale. Semus faeddande de sa “Sagra dei legumi”, chi est in programma domìniga 18 de su mese de cabudanni chi at a bènnere. Sa manifestatzione gastronòmica est organizada dae sa Pro Loco de Ollasta paris cun su Comunu e cun su “Consorzio Due Giare”.

Ma pro ite amus sutalineadu ca sa de Ollasta est una rassigna gastronomica ispetziale? Pro ite, a pustis de duos annos de pandemia, custa sagra torrat a abèrrere sas ghennas suas a sa valorizatzione de unas cantas produtziones importantes de su territòriu, est a nàrrere sa de sos legùmenes. Custos sunt produtos importantes pro s'economia de sa regione de sa Marmidda e los agatamus comente protagonistas in sos màndigos de sa coghina de su logu.

Sabores e traditziones ant a èssere tra sos elementos de sa rassigna. Custa - faghet ischire sa Presidente da sa Pro Loco Maria Fatima Mallocci paris cun su sìndigu de Ollasta Marcello Pilloni - est sa sagra prus importante de sa bidda e pro custa resone sos organizadores ant aprontadu una die intrea de atopos. Sa protagonista de s'editzione 2022 de “Sagra dei legumi” de Ollasta at a èssere sa coghina pòbera de sa comunidade de sa Marmidda. Duncas, sos màndigos ant a èssere sos de sa coghina de sos massajos, fatos cun ingredientes sèmplitzes comente sos legùmenes. Faeddamus de supas de fasolu, de chìghere e de gentilla e de minestras. Ant a èssere massimamente custos sos pratos chi s'ant a pòdere tastare domìniga 18 de cabudanni in Ollasta, bidda de 240 ànimas pagu prus o mancu.

Sa manifestatzione at a comintzare in su tzentru istòricu de sa bidda a sas 10.30 de su mangianu. A sas 11.30, in sa “Casa-Museo” est in programma “Albagiara e il suo territorio: testimonianze sulla coltivazione dei legumi” cun fotografias e videos. A sas 13.00 su tastu de sos màndigos fatos cun sos legùmenes. Sa sagra at a sighire cun ispetàculos chi ant a durare finas a trigadiu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22