Tratalias promotzionat sos produtos enogastronòmicos cun su "Wine Festival" e sa "Sagra del Pane"

In sa Mesa – Dae su 19 a su 20 de austu 2022 sa bidda de Tratalias, tzentru de orìgine medievale de su Surtzis serente a sa tzitade de Crabònia, at a acasagiare duos apuntamentos eno-gastronòmicos importantes pro sa promotzione de sos binos sardos e de sos màndigos tìpicos de Sardigna. Faeddamus de su "Wine Festival" e de sa "Sagra del Pane".

Tocat a pretzisare ca su "Wine Festival" est in programma su 19 e su 20 de austu, mentres sa "Sagra del Pane" s'at a isboligare feti sàbadu 20.

Sas duas dies sunt istadas organizadas dae sa Pro Loco de Tratalias e ant a èssere un'ocasione de importu pro unas cantas realidades produtivas, massimamente pro sas cantinas chi ant detzisu de leare parte a sa manifestatzione. Tra sas cantinas podimus numenare a su mancu sas prus famadas: sa Cantina Argiolas, sa Cantina Contini, sa Cantina Sardus Pater, sa de Santadi, sa seddoresa Su 'Entu, sa "Cantina di Calasetta".

Sa manifestatzione enològica, chi naschet cun sa punna de promotzionare unos cantos binos tra sos mègius de Sardigna, at a cumentzare su 19 de austu a sas 20.00 e at a èssere acumpangiada dae s'espositzione de sas òperas artìsticas de Bob Marongiu e dae sos ballos de "El Bario Salsero". S'at pòdere finas mandigare. Sos organizadores, difatis, ant pensadu de acumpangiare sos tastos de sas ampullas cun s'aprontamentu de pratos tìpicos.

Su "Wine Festival" at a sighire sa die in fatu, cando però est in programma finas sa "Sagra del Pane", s'atopu chi at sa punna de promotzionare custu produtu e finas sas àteras produtziones fatas dae su trigu. Tocat a pretzisare, difatis, ca tra sos momentos prus importantes de sa sagra b'est su laboratòriu chi si lamat "Dal grano al pane e alla pasta fatta in casa". Sa die de sa sagra, cumentzande dae sas 20.00 s'at a pòdere mandigare pane cun tomata, sartitza, melinzana, chibudda e gherdas.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22