"Top ten" mundiale pro s'ògiu biològicu de "Accademia Olearia"

In sa Mesa - Sighit e non si firmat sa resèssida manna de s'azienda agrìcula aligheresa "Accademia Olearia", chi sègudat sa "Top ten" mundiale pro s'ògiu biològicu de calidade. Dae su "World's Best Olive Oil", difatis, lompint bator reconnoschimentos de importu mannu pro s'azienda aligheresa.

S'azienda de sa famìlia Fois, duncas, cun s'ògiu biològicu suo si cunfirmat una realidade produtiva sarda de primore e lompet a su de chimbe postos a livellu mundiale in sa categoria "Miglior olio biologico".

Ma non est acabada inoghe! S'ògiu de "Accademia Olearia" est lòmpidu a su de bator postos a livellu mundiale finas in sa categoria "Miglior Frantoio" e a su de chimbe postos in sa categoria "Miglior Frantoio Biologico". Sos espertos de sa "World's Best Olive Oil" cunfirmant puru sa resèssida de s'azienda aligheresa pro s'ògiu "Riserva DOP Sardegna" (DOP est su marcu de "Denominazione di Origine Protetta"). Sa categoria in ue s'azienda otenet su de deghessete postos est sa "Miglior Olio al Mondo" .

Dae 20 annos "Accademia Olearia" faghet unu tipu de agricultura sustenìbile. No est pro nudda ca una parte de sa produtzione de olia est pensada pro èssere biològica. Pro s'azienda s'agricultura biològica est difatis unu puntu firmu chi non podet èssere lassadu a banda.

Cun custa punna onni annu "Accademia Olearia" faghet crèschere sa produtzione biològica sua; a lu sutalineare sunt sos meres de s'azienda etotu.

"Accademia Olearia" at finas un'impiantu fotovoltaicu capassu de satisfàghere totu su bisòngiu de energia de s'azienda. Tocat a pretzisare ca custa realidade produtiva impitat sos sutaprodutos de sa traballadura de sas olias pro sa produtzione de abba caente e pro alimentare s'impiantu de callentamentu.

Custos rapresentant resurtados bellos meda pro s'azienda e, comente sutalìneant sos meres etotu, sunt una cunfirma siat pro "Accademia Olearia" siat pro su territòriu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22