In Bànari sa festa de sa chibudda (de Bànari)

In sa Mesa - Lada, indeorada, nuscosa e durche: sa chibudda de Bànari est pronta pro èssere afestada. Pro su 24 e su 25 de trìulas, sa Pro loco de sa bidda de tiu Barore Sassu (unu intre sos prus poetas mannos de traditzione orale in Sardigna) est aprontende duas dies de atopos culturales e culinàrios.

Custa variedade est prantada in sos sartos de sa bidda pronta pro èssere regorta in custu mese de s’annu a pustis de unu protzessu bastante longu: semenada in argiola colada in sa metade de austu (su 9, su 10 e s’11 sa bidda si mudat a festa pro onorare su patronu suo, Larentu), est tramudada a sa terra unas 60 dies a pustis. Una borta collida, issa nche lompet a unu pesu intre sos 400 grammos e su chilu, pronta pro èssere impreada in coghina de milli maneras: comente cundimentu o comente pratu ùnicu.

Prus chi non saborida sa chibudda intrea cota in su furru. Ma issa est bastante durche chi podet èssere impreada crua pro cundire s’insalada. Sa bidda sua, Bànari, in su Meilogu, est dae tempus chi est dende valore a su produtu suo pro mèdiu de festas e rassignas.

Ma ite est chi faghet de custa variedade de allium cepa una chibudda a banda dae sas àteras? Pro primu cosa su patrimòniu genèticu de su sèmene tramandadu dae sèculos, dae generatziones de massajos. Posca b’at de pigare in cunsideru sa calidade de su terrinu de sos padros banaresos, ricos de luzana.

Sa Pro loco chi est contivigende custu apuntamentu tenet pagos annos de atividade ma punnat a unu reconnoschimentu de custa chibudda. Chibudda chi faghet parte de su logo matessi de s’assòtziu. E chi s’artista banaresu Giuseppe Carta at pintadu in sos cuadros suos. Carta matessi est faghende un’iscultura chi ant a inaugurare in intro de sa festa. E in sa festa b’at a àere logu finamentas pro sa poesia, sa mùsica, sas passigiadas in sas camineras de intro e in foras de sa bidda. E issa, sa reina de s’apuntamentu, s’at a pòdere tastare gràtzias a sa pratza de Umberto I, mègius connota comente pratza de Santu Jagu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22