Santu Sparau: torrat sa sagra de sos malloreddos de stua e petza de puddu

In sa Mesa - Domìniga 19 de su mese de làmpadas torrat in Santu Sparau sa “Sagra dei malloreddus de stua”. Semus faeddande de una sagra aprontada pro promotzionare su produtu tìpicu chi, a manere rigorosa, si faghet feti cun petza de puddu.

Pro s'annu 2022 sa festa lompet a sa de sete editziones e at a rapresentare un'ocasione importante pro ammentare ca, in su tempus antigu, a sa fine de sa messadura, sos chi biviant in Santu Sparau aprontaiant una festa. Pro fàghere festa si faghiat una maccaronada, est a nàrrere ca si ammaniànt macarrones cun bagna de puddu.

In die de oe, sa sagra de sos malloreddos de stua est oganizada dae s'assòtziu turìsticu Pro Loco de Santu Sparau. Su programma de ocannu at a èssere ricu e previdit addòbios interessantes. S'at a cumentzare a sas 18.00 de su merie cun sa bìsita a sos murales de sa bidda campidanesa e cun s'iscoberta de su Parcu de sos Sonos de Pinuccio Sciola, s'artista nodidu de Santu Sparau. Sas bìsitas sunt aprontadas dae s'assòtziu culturale e turìsticu “Fentanas”. Pro prenotare una bìsita, duncas, tocat a telefonare a su nùmeru de s'assòtziu etotu: su 328 477 47 06.

Su programma at a sighire a sas 18.30 in pratza New York cun giogos e ispetàculos de “cabaret” pro mannos e pitzinnos; posca, a sas 19.30 ant a cumentzare sos ballos sardos, chi ant a èssere acumpangiados dae sas launeddas e dae sa mùsica de su sonetu.

Su momentu prus de importu de sa festa at a arribare a sas 20.00, cun sa sagra de sos malloreddos de stua e petza de puddu. Paris cun sos macarrones at a èssere possibile bufare una tassa de binu o de abba, e mandigare finas pane, durches e unu pèssighe. Tocat a ammentare, difatis, ca Santu Sparau detennet su primu postu in Sardigna comente tzentru produtore de custa frùtora. Duncas, sa sagra de sos malloreddos de Santu Sparau at a rapresentare finas un'ocasione pro promotzionare custa bella produtzione de sa bidda chi s'agatat a 20 km dae Casteddu.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22