In Carluforti torrat su Girotonno

In sa Mesa - In Carlufurti, dae su 2 a su 5 de su mese de làmpadas 2022 at a torrare "Girotonno - Uomini, storie e sapori sulle rotte del tonno". S'àddòbiu, tra sabore e turismu, at a àere comente protagonista sa tonnina e at a lòmpere in su 2022 a sa de degheoto editziones.

Paris cun sa tonnina, protagonistas de sas bator dies de festa ant a essere sos “chef” isteddados chi ant a lòmpere de bator Paisos pro una gara de coghina interessante, nuscosa e de sabore. Galu, sunt prevìdidos “cooking show”, tastos e addòbios chi ant a àere comente protagonista sa tonnina ruja de calidade, est a nàrrere su pische chi si piscat dae semper in s'ìsula de Santu Pedru.

Sa manifestatzione, ordingiada dae sa Comuna de Carluforti in collaboratzione cun s'agentzia "Feedback", at a àere comente momentu importante sa gara gastronomica internatzionale, s'"International Tuna Competition", chi at a bìere sos "chef" italianos, giaponesos, colombianos e libanesos chi ant a realizare retzetas cun tonnina cota e crua.

S'iscuadra italiana at a èssere ghiada dae su "chef" Davide Atzeni (de su ristorante “Coxinendi” de Seddori) e dae su chef Mauro Ladu (de s'osteria “Abbamele” de Mamujada), mentras s'iscuadra libanesa at a èssere ghiada dae su "chef" Richard Abou Zaki (de su ristorante “Retroscena” de Porto San Giorgio – Fermo); sa Colòmbia at a èssere rapresentada dae s'"executive chef" Jose Narbona Rodriguez (de su ristorante colombianu “Mitù”, de Milanu); in fines su Giapone at a àere comente protagonista su "chef" Roberto Okabe (de su ristorante “Finger's” de Milanu).

In su programma "Girotonno - Uomini, storie e sapori sulle rotte del tonno" amus a bìdere "live cooking" interessantes meda, chi ant a valorizare sas retzetas de tonnina interpretadas dae sos "chef" italianos e internatzionales. Ant a èssere presentes su "chef" Hirohiko Shoda, pessonàgiu de sa televisione e de sa ràdiu, autore de libros e de "format tv", e galu sos "chef" isteddados: Cristina Bowerman, Gianfranco Pascucci e Francesco Stara. Luigi Pomata, de su ristorante famadu meda in Sardigna; Roberto Serra, de su ristorante Su Carduleu de Abbasanta; Secondo Borghero, de su ristorante "Tonno di Corsa" de Carluforti, ant a rapresentare sa Sardigna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22