Una resèssida noa pro s'azienda Passiu de Aristanis

In sa Mesa - Una resèssida noa pro s'azienda Passiu de Aristanis: su "Riso Passiu" est tra sos 100 produtos de primore promotzionadu da sa rivista "Forbes Italia 2022".

Una tarea noa pro s'azienda sarda chi at sa domo sua in Aristanis, a manera pretzisa in carrera "Duomo" 17. S'"Azienda Agricola Passiu", difatis, est s'ùnica azienda in Itàlia sinnalada in sas pàginas de su "magazine" americanu de economia.

In s'addòbiu chi s'est isboligadu in s'"Hotel Principe di Savoia" de Milanu, s'azienda Passiu, rapresentada dae su titulare e responsàbile cummertziale e
"marketing" Felice Passiu, at leadu unu reconnoschimentu importante "comente realidade chi est resèssida a valorizare sos produtos de su territòriu moende dae un'atuamentu, chi a pustis est istadu coltivadu cun esperièntzia e capatzidade”.

"Semus onorados – cummentant sos meres de s'azienda - de retzire custu reconnoschimentu importante". Pro sos de Passiu custa est sa cunfirma de sa calidade de su risu issoro. "A segus de custa resèssida - cummentat Felice Passiu - b'est unu traballu mannu, bi sunt determinatzione e costàntzia". E sighit pretzisande: "chergio cumpartzire custa emotzione cun totu s'iscuadra 'Riso Passiu' e cun totu sos chi ant àpidu aficu in nois […]. Semus artivos de rapresentare sa Sardigna e de èssere tra sas 100 aziendas de primore de su 'made in Italy'"

Pro sos de Passiu, duncas, custu est unu resurtu importante, chi lis dat cunfirma de àere fatu unu produtu capassu de rèere s'acaramentu cun sas regiones de sa Penìsula chi sunt famadas pro sa coltivatzione de su risu.

S'azienda sarda intrat cun mèritu in s'isseberu de sas 100 resessidas italianas cumpartzidas in bator categorias: "hotel", "ristoranti", "prodotti alimentari" e "vini".

In duos faeddos s'azienda Passiu rapresentant sos mègius màndigos de su "made in Italy" e est peri sa fotografia de un'imprenditorialidade atenta e fine.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22