Sardigna de su cabu de giosso: tastos a Km0 cun "Mangia Sardo"

In sa Mesa - Cun "Mangia sardo" sa Sardigna de su cabu de giosso promovet unu progetu cun tastos a Km0. Su progetu naschet dae sa "partnership" de "Fipe-Confcommercio Sud Sardegna" cun "Coldiretti" e "Campagna Amica Cagliari".

"Mangia sardo" est un'initziativa chi aunit sa filiera sarda de s'agrualimentare e ligat sa terra cun sa mesa.

S'idea de "Fipe-Confcommercio Sud Sardegna", de "Coldiretti" e "Campagna Amica Cagliari" at sa punna de afortiare s'allèatzia tra su mundu agrìculu e su mundu de sa ristoratzione. S'obietivu est su de promovere su consumu de su produtu fatu in Sardigna. Duncas "Mangia sardo" s'isbòligat gràtzias a sos produtos de primore.

"Mangia sardo" incumentzat sa caminera sua cun s'iscartzofa, reina de sa massaria sarda. S'ìsula est tra sos produtores prus mannos de iscartzofa siat cunforma a s'Itàlia siat cunforma a s'Europa; la sighint sa Puglia e sa Sitzìlia.

In Sardigna si coltivant 12mila ètaros pagu prus o mancu de iscartzofa de sa ratza "carciofo spinoso", unu tipu de iscartzofa chi at peri sa "Denominazione di origine protetta", chi est indicada cun sa sigla DOP.

Sa manifestatzione est incumentzada chenàbura 18 de su mese de martzu 2022 e s'at a serrare domìniga 27.

"Mangia sardo" at comente protagonistas 25 operadores gastronomicos de "Fipe Confcommercio" Casteddu. Operadores chi ant a ingregare su paladu de sa gente cun retzetas acumpridas cun s'iscartzofa produida dae sas aziendas de "Campagna Amica".

Duncas, pro 10 dies s'iscartzofa sarda s'at a pòdere tastare fata in onni manera, dae sas retzes clàssicas chi presentat pratos comente sas lorighitas, sa frègula e sos culurgiones cundidos cun iscartzofa, a sa retzetas innovativas comente sos Hamburger e sa pitza cun iscartzofa.

De onni manera "Mangia sardo" non si firmat cun s'iscartzofa, ma in sas chidas imbenientes at a promovere finas àteros produtos de primore fatos dae sas aziendas agrìculas sardas de "Coldiretti-Campagna Amica". Sunt produtos chi ant a valorizare sos pratos de sos ristorantes "Fipe Confcommercio".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22