"Otto Passi": su casu naturale de fatoria

In sa Mesa - "OttoPassi" rappresentat su contadu de su casu naturale de fatoria. "Otto Passi" est una "startup" agrìcula de su Marghine, una fatoria a condutzione familiare chi pesat berbeghes e faghet casu. "Otto Passi" est peri su tretu chi faghet su late dae sos aposentos de murghidura in ue si faghet su casu.

Faeddamus de una fatoria de 200 ètaros de terra coltivada, chi acasàgiat unos milli berbeghes e chi at printzipiadu unu modellu produtivu sustenìbili, chi abbàidat a s'ambiente, a sos animales e sas salude de s'òmine. Sa sustenibilidade de "Otto Passi" est una sustenibilidade a 360°: moet dae su "packaging", fatu cun s'impreu de su pabiru pro imboligare e cunservare su casu, e arribat finas a su reimpreu de sa lana de berbeghe e a s'idea de impreare su ledàmene de sas berbeghes pro produire energia.

Nàschida in su 2019, "Otto Passi" aunit traditzione e innovatzione. Lu faghet impreende tecnologias modernas siat pro atèndere a sos animales siat pro coltivare sos terrinos aziendales. Difatis, custa realidade produtiva de Sardigna si presentat comente un'azienda moderna, chi traballat finas cun sos tzentros de chirca e cun sos entes regionales.

A a sa ghia de "Otto Passi" bi sunt Rita, Luca e Paolo. Sa primu produtzione de casu est istada in su 2021. Semper in su 2021 su casifìtziu at leadu parte a su progetu "Valides" ("Valorizzazione e tutela dei sistemi di produzione agroalimentare Identitari del centro Sardegna"), chi fiat cordinadu dae AGRIS, s'agenzia de sa Regione Autònoma de Sardigna. "Valides" est su progetu pro sa caraterizatzione de sa tutela de sa biodiversidade microbica de sas matèrias primàrgias: sas de traballare galu e sas de sos produtos belle che fatos.

Tra sas propostas de primore de "Otto Passi" bi sunt tres licanzias, est nàrrere: su casu berbeghinu, su "stracchino" e su casizolu de berbeghe. Custos sunt feti tres tra sos produtos prus famados de sa startup agrìcula chi at peri unu mercadu foras de Sardigna.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22