50 annos de DOC pro su Muscadellu de Sossu e de Sènnaru

In sa Mesa - In su mese de abrile sa DOC (“Denominazione d'Origine Controllata”) de su Muscadellu de Sossu e de Sènnaru faghet 50 annos. A inghìriu de custu mesu sèculu de vida s'ant a isboligare una filera de adòbios chi ant comente tema su binu Muscadellu.

A organizare sos adòbios, chi ant a contare s'istòria de custu binu de primore, est sa comuna de Sènnaru paris cun sa "Camera di Commercio Nord Sardegna", cun s'assòtziu "Città del vino" e cun s'assòtziu "Turismo del vino della Sardegna".

Su primu adòbiu, est a nàrrere su cunvegnu "Sulle strade del Moscato", est prevìdidu a sas 17.00 de sa primu die de mese mese de abrile in su "Centro culturale Antonio Pazzola" de Sènnaru. In su cunvegnu s'at a faeddare de temas ispetzìficos comente sa coltivatzione e sa produtzione de su Muscadellu; s'at a chistionare finas de sos aspetos cummertziales de custu binu e de sas potentzialidades chi at in su mercadu italianu e internatzionale.

"Sulle strade del Moscato" at a aprofundire sos temas istòricos pro mèdiu de sas testimonias de sos de su logu. Testimonias chi faeddant de s'impreu de sa bide in sas traditziones populares. Finas s'arresonu de sa "Confraternita del Moscato Sorso-Sennori" at a èssere unu momentu interessante. Custu, difatis, est un'assòtziu de bingiateris e de produtores chi in sos ùrtimos deghènnios at creadu un'istrategia pro torrare a promòvere custa ratza de bide paris cun su binu chi produit.

Sos adòbios ant a sighire sàbadu 2 de su mese de abrile e s'ant a mudare in contos multimediales e multiculturales. A pustis, a sas 16.00, in su "Centro servizi Rosa Gambella" s'at a isboligare sa tzerimònia de sa targa chi afestat sos 50 annos de su Muscadellu DOC. At a sighire un'àndala de "trekking" urbanu. Su “trekking” s'at a isboligare in sas carreras de Sènnaru interessende assòtzios, tzitadinos e istitutziones chi ant a àere su còmpitu de contare sa bidda e sas traditziones suas. S'àndala de su "trekking" s'at a concluire cun sa projetzione de su docufilm de Maria Paola Cordella, "Romangia, ricami di terra tra cielo e mare. Storie di vite: da ieri a oggi".

Sa manifestatzione at a èssere acumpangiada dae tastos in "stand" de "street food". Sos adòbios ant a sighire su 22 de su mese de trìulas cun "Calici di stelle" e in su mese de làdamine cun sa binnenna.

A sa manifestatzione est assotziadu peri unu cuncursu de ideas pro sa creatzione de un'eticheta chi alabat sos 50 annos de DOC.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22