Unu cursu pro fàghere birras màstrinas

In sa Mesa - Ocannu at a lompere a sa de duas editziones, si lamat  "Birraio Artigiano" e est unu cursu de 70 oras chi at sa punna de imparare a fàghere birras màstrinas.

Sa domanda pro leare parte a su cursu "Birraio Artigiano" depet èssere fata intro su 7 de su mese de freàrgiu 2022. Sos cursos ant su patrotzìniu de sa Comuna de Su Masu e de sa Comuna de Gùspini e sunt ordingiados cun sa collabboratzione de su birrifìtziu "4 Mori" de Monti Bèciu e cun su birrifìtziu Alvure de Su Masu. Duas realidades sardas de primore pro sa produtzione de birra màstrina de calidade.

No est totu, pro ite su progetu at peri sa collabboratzione logìstica de s'"Istituto Superiore di Istruzione Agraria Duca degli Abruzzi" de Su Masu.

Su cursu at a cumintzare a fine de su mese de freàrgiu e s'at a concluire intro su mese de maju. Sa chida at a èssere aprontada cun duas letziones fatas semper a borta de die in dies feriales, mai in die nòdida.

Onni letzione de  "Birraio Artigiano" s'at a isboligare in àula pro sa teoria (36 oras) e in birrifìtziu pro sas letziones pràticas (28 oras). Ses oras ant a èssere dedicadas a s'orientamentu e pertocant a sa fase finale de s'atividade.

"Birraio Artigiano" at comente obbietivu su de formare birràios màstrinos novos. Cun custu cursu, difatis, at a èssere possìbbile achirire sas connoschèntzias e s'abilesa netzessària pro pòdere proare a produire birra màstrina siat comente hobbista siat comente professionista.

Su cursu, duncas, est abertu a sos chi sunt interessados a imparare comente si faghet sa birra màstrina. Podent leare parte a "Birraio Artigiano" petzi sos istudiantes chi ant un'edade mìnima de 18 annos.

"Birraio Artigiano", previdit un'esàmene finale chi at sa finalidade de dimustrare sa resèssida de sos obbietivos didàticos. A fine de cursu at a èssere cunsignadu un'atestadu de partetzipatzione.

Attività realizzata col contributo della Regione Sardegna - IMPRENTAS 2021-2022. LR 22/2018, art. 22