Sa De.C.O, est a nàrrere sa "Demoninazione comunale di origine"

In sa Mesa - Sa De.C.O, est a nàrrere sa "Demoninazione comunale di origine", est un'istrumentu importante pro valorizare sos territòrios. Sa De.C.O est una tzertificatzione de su setore agrualimentare chi at sa funtzione de ligare unu produtu cun su territòriu de sa Comuna sua.

A manera diversa de sas denominatziones protègidas europeas, sa De.C.O benit disciplinada dae sa Comuna, duncas podet èssere frutu de initziativas de valorizatzione locale e podet pertocare finas a sas retzetas tìpicas de su logu.

S'initziativa pro sa protetzione de unu produtu o de unu protzessu traditzionale netzessària pro otennere sa tzertificatzione De.C.O la podent leare finas sos tzitadinos o sas aziendas produtoras. Tzitadinos e aziendas devent signalare s'idoneidade a sa tzertificatzione e peri s'importàntzia chi su produtu o su protzessu ant pro sa comunidade.

Su marcu De.C.O permitit a sas Comunas de disciplinare sa valorizatzione de sas atividades agrualimentares traditzionales. Sa "Demoninazione comunale di origine", duncas, dimustrat s'orìgine locale de su produtu. Non est totu, pro ite sa Comuna fissat finas sa cumpositzione sua e duncas garantit sos ingredientes a sos produtores de su territòriu.

Cun sos annos, sa De.C.O est divènnida finas un'istrumentu de marketing territoriale: lu faghet comunichende e promovende su patrimòniu culturale e ambientale.
Pro mèdiu de custa tzertificatzione su produtu agrualimentare e/o enogastronomicu de su territòriu achirit in su mercadu un'identidade ladina.

In matèria De.C.O est importante sutalineare ca sos produtores e sos bendidores de produtos agrualimentares locales de primore podent iscrìere sos produtos issoro in su registru de sa De.C.O.: a ogni produtu at a èssere postu su marcu comunale, chi est cumpatìbile cun denominatziones europeas comente sa DOP ("Denominazione di Origine Protetta") o sa IGP ("Indicazione geografica protetta").

Attività realizzata col contributo della Regione Sardegna - IMPRENTAS 2021-2022. LR 22/2018, art. 22