S'"Open Day" lichitosu de s'“Alberghiero” de Pula

In sa Mesa - S'11 de su mese de ghennàrgiu chi at a bènnere, s"Istituto di Istruzione Superiore Domenico Alberto Azuni" de Pula at a isboligare un'"open day" lichitosu. Cristian Collu de su ristorante "Machrì" de Pula e Marco Mulas, binchidore in su 2015 de sa primu editzione de su "Master Pizza Champion" e in die de oe chef-pitzaiolu de “eTrigu”, pitzeria e "bistrot" de Casteddu, ant a èssere sos res de sa coghina. Pro s' “open day” at a èssere oferta pròpiu sa pitza. Una pitza gourmet, cundida cun duos ingredientes de primore chi faeddant de Sardigna: su mugheddu e s'iscariola.

S'“Alberghiero” de Pula, duncas, s'11 de ghennàrgiu a sas 10.30 de mangianu at a abèrrere sa ghenna sua a sos istudiantes de sas iscolas medias inferiores de sa provìntzia de Casteddu. Los at acasagiare cun una proposta "gourmet" fata cun produtos de su territòriu. Un'issèberu importante e ùtile pro fàghere connòschere sas licantzadorias sardas.

Sa die de orientamentu in programma at a èssere una die lichitosa, una die acumpangiada dae una pitza delitziosa.

E ite s'at a bufare? Tocat a sutalineare ca s'"Istituto di Istruzione Superiore Domenico Alberto Azuni" at aprontadu unu brìndisi ispetziale e ca lu at organizadu s'iscuadra de sa FIB, est a nàrrere de sa "Federazione Italiana Barman Academy Regione Sardegna". Difatis, a sa pitza de Collu e Mulas sa FIB at a allobare unu "cocktail ad hoc".

Sa pitza pensada pro s'"open day" e batijada cun su nùmene de "Muggine a 6 mani" at a leare parte a su campionadu mundiale de pitza a duos gourmet de su 5, 6 e 7 de su mese de abrile de su 2022. Ma pro ite sa pitza gourmet de s'"open day" est istada batijada "Muggine a 6 mani"? Pro ite in prus de sos duos chef ddoe sunt peri sas manos de su barman chi at realizadu su cocktail chi la acumpàngiat.

Sa pitza ""Muggine a 6 mani" - acrarat Marco Mulas - at a èssere fata sighende sa filosofia de sa istajonalidade e sa de valorizare su produtu de su territòriu".

Attività realizzata col contributo della Regione Sardegna - IMPRENTAS 2021-2022. LR 22/2018, art. 22